शिवसेनेच्या नेत्यावर भररस्त्यात निहंगांकडून तलवारीने जीवघेणा हल्ला; प्रकृती गंभीर, VIDEO
Attack on Shivsena Leader : शिवसेना पंजाबचे नेते संदीप थापर शुक्रवारी दुपारी लुधियाना सिव्हिल हॉस्पिटलबाहेरील व्यस्त रस्त्यावर स्कूटरवरून जात असताना त्यांच्यावर हा प्राणघातक हल्ला झाला.
पंजाबमधील शिवसेना नेते संदीप थापर उर्फ गोरा (वय ५८) यांच्यावर निहंग वेषातील तीन अज्ञात लोकांनी तलवारीने जीवघेणा हल्ला केला. मिळालेल्या माहितीनुसार तीन निहंगांनी लुधियाना सरकारी रुग्णालयाच्या बाहेर त्यांच्यावर तलवारीने अनेक वार केले. हल्ला करून ते फरार झाले. थापर यांना गंभीर अवस्थेत रुग्णालयात दाखल करण्यात आले आहे.
शिवसेना पंजाबचे नेते संदीप थापर शुक्रवारी दुपारी लुधियाना सिव्हिल हॉस्पिटलबाहेरील व्यस्त रस्त्यावर स्कूटरवरून जात असताना त्यांच्यावर हा प्राणघातक हल्ला झाला.
या घटनेच्या सीसीटीव्ही फुटेजमध्ये आरोपी थापर यांचा पायी पाठलाग करताना दिसत आहेत. एका हल्लेखोराने त्याच्या डोक्यावर तलवारीने वारंवार वार करण्यापूर्वी थापर हात जोडून दयेची भीक मागताना दिसले. दुसऱ्या निहंगने तलवारीने हल्ला सुरू ठेवल्याने शिवसेना पंजाबच्या नेत्याचा तोल गेला आणि ते स्कूटरसह रस्त्यावर पडले. हे पाहून तेथील लोकांना धक्का बसला. हल्ल्यानंतर ते सर्वजण पळून गेले.
थापर यांच्यासोबत असलेला एकमेव बंदूकधारी अंगरक्षक रस्त्याच्या कडेला गेला आणि मूकदर्शक म्हणून बघत राहिला. थापर यांना वाचवण्यासाठी तसेच हल्लेखोरांचा पाठलाग करण्याचा प्रयत्न त्याने केला नाही.
ट्रस्टचे संस्थापक-अध्यक्ष रवींद्र अरोरा यांच्या चौथ्या पुण्यतिथीनिमित्त आयोजित समारंभात सहभागी झालेल्या सिव्हिल हॉस्पिटलजवळील संवेदना ट्रस्ट या स्वयंसेवी संस्थेच्या कार्यालयातून थापर बाहेर पडल्यानंतर हा हल्ला झाला.
प्रत्यक्षदर्शींनी गंभीर अवस्थेत त्यांना सिव्हिल हॉस्पिटलमध्ये नेले, तेथून स्थानिक दयानंद वैद्यकीय महाविद्यालय व रुग्णालयात पाठविण्यात आले. अज्ञात हल्लेखोरांविरोधात खुनाच्या प्रयत्नाचा गुन्हा दाखल करण्यात आला असून त्यांचा शोध सुरू असल्याची माहिती पोलिस उपायुक्त जसकीरनजीतसिंग तेजा यांनी दिली.
या घटनेनंतर शिवसेना पंजाबच्या नेत्यांनी सिव्हिल हॉस्पिटलबाहेर जमून पंजाब सरकार आणि पोलिसांविरोधात घोषणाबाजी केली. शिवसेना पंजाबचे युवा आघाडीचे अध्यक्ष सुमित अरोरा यांनी सांगितले की, थापर यांना तीन बंदूकधारी देण्यात आले होते, परंतु पोलिसांनी आठवडाभरापूर्वी त्यांची सुरक्षा काढून घेतली. त्यानंतर एका बंदूकधारीची सेवा पूर्ववत करण्यात आली. अरोरा यांनी आरोप केला की, बंदूकधारीने आरोपींना पळून जाण्यात मदत केली.
शिवसेना पंजाबचे अध्यक्ष राजीव टंडन म्हणाले की, हिंदू संघटनांच्या नेत्यांच्या सुरक्षेबाबत पोलिस आणि सरकार गंभीर नाही. त्यांनी आमच्या नेत्यांची सुरक्षा काढून हे सिद्ध केले आहे.
मिळालेल्या माहितीनुसार थापर नियमितपणे खालिस्तानविरोधात विधाने करत असतात. त्याचबरोबर पंजाबमधील शेतकरी आंदोलनाच्या विरोधातही प्रतिक्रिया दिल्या आहेत. थापर यांच्या समर्थकांनी सांगितले की, गेल्या अनेक दिवसांपासून त्यांना धमक्या मिळत होत्या. मात्र सरकारने त्यांना सुरक्षा दिली नाही. घटनेच्या वेळी परिसरात लोकांची गर्दी होती, मात्र आरोपींच्या हातातील शस्त्रे पाहून कोणीही पुढे जाण्याचा धाडस केले नाही.
संबंधित बातम्या