काश्मीरमध्ये हिजबुल्लाहच्या समर्थनार्थ हजारो लोक उतरले रस्त्यावर, इस्त्रायलविरोधात जोरदार घोषणाबाजी
Hezbollah nasrallah : बैरूतमध्ये मारल्या गेलेल्या हिजबुल्लाह प्रमुखाच्या मृत्यूविरोधात भारतातही निदर्शने करण्यात आली. जम्मू-काश्मीरमधील बडगाममध्ये हिजबुल्लाहच्या समर्थनार्थ लोक रस्त्यावर उतरले.
बैरूतमध्ये मारल्या गेलेल्या हिजबुल्लाह प्रमुख नसरल्लाह (Hezbollah Chief Nasrallah) यांच्या मृत्यूविरोधात भारतातही निदर्शने करण्यात आली. जम्मू-काश्मीरमधील बडगाममध्ये हिजबुल्लाहच्या समर्थनार्थ लोक रस्त्यावर उतरले. स्थानिक अधिकाऱ्यांनी दिलेल्या माहितीनुसार, हसनाबाद, रैनावारी, सैदाकदल, मीरबिहारी आणि आशाबाग भागात लहान मुलांसह मोठ्या संख्येने लोक काळे झेंडे घेऊन रस्त्यावर उतरले. मात्र, आंदोलन शांततेत पार पडले.
निदर्शकांनी इस्रायल विरोधी आणि अमेरिकाविरोधी घोषणा दिल्या आणि लेबनानी दहशतवादी गटाच्या प्रमुख नेत्याच्या हत्येचा निषेध केला. या आंदोलनाचे व्हिडिओही सोशल मीडियावर व्हायरल होत आहेत. या आंदोलनाच्या पार्श्वभूमीवर परिसरात मोठ्या संख्येने पोलीस बंदोबस्त तैनात करण्यात आला होता. नॅशनल कॉन्फरन्सच्या नेत्या आगा रुहुल्ला यांनी आपला निवडणूक प्रचार रद्द करून आंदोलनात सहभाग घेतला, तर पीडीपीच्या मेहबूबा मुफ्ती यांनीही आपला प्रचार रद्द केला.
एएनआय या वृत्तसंस्थेने दिलेल्या वृत्तानुसार, या निदर्शनाच्या आयोजनात भूमिका बजावणारे अंजुमन-ए-शरीचे अध्यक्ष शियान आगा सय्यद म्हणाले की, हसन नसरल्लाह यांच्या निधनाबद्दल आम्ही कितीही शोक व्यक्त केला तरी तो नेहमीच कमी असेल... शांतता असावी आणि तेच त्यांचे ध्येय होते. तो मानवतेसाठी काय करतो आहे आणि त्याला काय हवे आहे हे लोकांना कळू नये म्हणून त्याच्यावर दहशतवादात सामील असल्याचा आरोप करण्यात आला होता. त्यांना पॅलेस्टाईनच्या लोकांसाठी पॅलेस्टाईनला स्वतंत्र करायच्या प्रयत्नात होते. मी संपूर्ण मानव जातीला आणि इस्लामी देशांच्या लोकांना सांगू इच्छितो की, त्यांचे बलिदान व्यर्थ जाऊ देऊ नये. त्यांची पोकळी भरून काढता येणार नाही पण त्यांच्या रक्तातून हजारो नसरल्ला जन्माला येतील आणि हे मिशन पुढे नेतील आणि यश संपादन करतील हे निश्चित.
आखाती देश लेबनॉनमध्ये हिजबुल्लाहला (Hezbollah) शक्तिशाली निमलष्करी आणि राजकीय शक्ती बनवण्यात महत्त्वाची भूमिका बजावणारा हिजबुल्लाहचा म्होरक्या हसन नसरल्ला इस्रायलच्या हवाई हल्ल्यात ठार झाला आहे.
नसरल्लाह यांनी २००६ मध्ये इस्रायलविरुद्ध हिजबुल्लाहच्या युद्धाचे नेतृत्व केले होते. हिजबुल्लाहने निवेदनात म्हटले आहे की, सय्यद हसन नसरल्लाह आपल्या सहकारी महान हुतात्म्यांमध्ये सामील झाले आहेत, ज्यांना त्यांनी ३० वर्षे एका विजयापासून दुसऱ्या विजयापर्यंत नेले, असे हिजबुल्लाहने एका निवेदनात म्हटले आहे. या हल्ल्यात केवळ नसरल्लाच नव्हे तर त्यांची मुलगी जैनब नसरल्लाह यांचाही मृत्यू झाल्याचा दावा केला जात आहे. नसरल्लाहच्या मृत्यूनंतर आता हिजबुल्लाहची कमान कुणाकडे सोपवली जाणार, हा सर्वात मोठा प्रश्न आहे.
