Mahakumbh Traffic Jam Video : प्रयागराजमध्ये उसळला जनसागर, येण्या-जाण्याचे सर्व मार्ग बंद, वाहतूक कोंडीने भाविकांचे हाल

प्रयागराज महाकुंभात देशाच्या कानाकोपऱ्यातून लोक येत आहेत. गर्दीचा ताण इतका आहे की, संगमाकडे जाणारा प्रत्येक रस्ता जॅम झाला आहे. राष्ट्रीय महामार्गावरून प्रयागराज शहराकडे जाणारी वाहनेही रेंगाळत आहेत. अनेक किलोमीटरपर्यंत प्रचंड वाहतूक कोंडी आहे. शहराला जोडणाऱ्या प्रत्येक रस्त्यावर कोंडी होत असल्याने कुंभमेळ्यापर्यंत जाण्यासाठी नागरिकांना २० ते २५ किलोमीटर पायपीट करावी लागत आहे.

वऱ्हाड पुढं निघून गेलंं अन् नवरदेव अडकला ट्रॅफिकमध्ये; त्यानंतरचा व्हिडिओ पाहून हसू आवरणार नाही!

प्रयागराजकडे जाणाऱ्या सर्व मार्गांवर वाहनांच्या लांबच लांब रांगा -

प्रयागराजला जोडणारे सर्व प्रमुख रस्ते वाराणसी, जौनपूर, मिर्झापूर, कौशांबी, प्रतापगड, रीवा आणि कानपूर मार्ग आहेत. वाहनांमध्ये अडकलेल्या भाविकांना मेळ्यापर्यंत पोहोचण्यासाठी अनेक अडचणींना सामोरे जावे लागत आहे. लहान मुले, वृद्ध आणि महिलांना तासनतास अन्न व पाण्यावाचून रहावे लागत आहे. शहराबाहेरील महामार्गालगत प्रशासनाने स्वतंत्र वाहनतळ तयार केले आहेत. मात्र, बहुतांश वाहनतळ भरल्याने वाहने रस्त्यावरच अडकून पडली आहेत. ही प्रचंड कोंडी दूर करण्यासाठी नागरी आणि वाहतूक पोलिसांबरोबरच निमलष्करी दलही तैनात करण्यात आले आहे. येथे बालसन चौक, छोटा बघरा, बांगर धर्मशाळा चौक, जनसनगंज चौक अशा प्रमुख ठिकाणी चालणेही अवघड झाले आहे.

पंतप्रधान नरेंद्र मोदी यांनी मंत्रोच्चारांच्या साक्षीनं पवित्र त्रिवेणी संगमात मारली डुबकी

अखिलेश यांनी पोस्ट करत लिहिले की, भाविकांचे हाल कोणी पाहणार का?

दरम्यान, सपा अध्यक्ष अखिलेश यादव यांनी या जामवर ट्विट करत सरकारवर हल्ला बोल केला आहे. अखिलेश यांनी पोस्ट करत लिहिले की, 'भक्तांच्या राज्यात कोणी आहे का?

अखिलेश यादव यांनी लिहिले की, जाममध्ये अडकलेल्या लोकांना तासनतास त्यांच्या वाहनांमध्ये कैद आहेत. महिलांना त्यांच्या दैनंदिन गरजांसाठीही जागा नाही. वाटेत जे बेशुद्ध पडत आहेत, त्यांची काळजी घेण्याची व्यवस्था नाही. यात्रेकरूंच्या मोबाइल फोनच्या बॅटरी संपल्याने त्यांच्या प्रियजनांशी संपर्क तुटला आहे. संपर्क आणि माहितीच्या अभावामुळे लोकांमध्ये अस्वस्थता वाढली आहे. परिस्थिती नियंत्रणात आणण्यासाठी जबाबदार मंत्री किंवा व्यक्ती दिसत नाही. मुख्यमंत्री पूर्णपणे अपयशी ठरले आहेत, तसेच उपमुख्यमंत्री आणि प्रयागराजशी संबंधित अनेक प्रमुख मंत्री गैरहजर आहेत. ज्यांना लोकांमध्ये असायला हवे होते ते आपापल्या घरात बसले आहेत. दिवसरात्र उपाशी-तहानलेले काम करणारे सैनिक, चतुर्थश्रेणी कर्मचारी किंवा सफाई कर्मचारी यांच्यासाठी अन्न-पाण्याची व्यवस्था नाही. अधिकारी खोल्यांमध्ये बसून आदेश देत आहेत, पण जमिनीवर उतरत नाहीत.

प्रयागराजच्या रहिवाशांना घाण, वाहतूक कोंडी आणि महागाईशिवाय काहीच मिळालेले नाही. सगळीकडे वाईट व्यवस्था पसरली आहे, हे माहीत असताना सर्वप्रथम भाविक का येत आहेत, असा आरोप आता भाजपकडून भाविकांवर केला जात असल्याचे ऐकिवात आहे. कोणी राज्यात अपघातात मरण पावलेल्या लोकांना तेथेच सोडून दुसऱ्या राज्यात समारंभाला हजेरी लावत आहे, कोणी परदेशात जात आहे, कोणी भक्तांच्या कल्याणासाठी आहे का?