Palghar Accident : कार आणि दुचाकीची समोरासमोर धडक, तीन जण जागीच ठार; पालघर येथील घटना

राहुल हरके (वय, २०), चिन्मय चौरे (वय, १९) आणि मुकेश वावरे (वय, २०) अशी मृतांची नावे आहेत. हे तिघेही पालघर जिल्ह्यातील डहाणू तालुक्यातील कासा चारोटी परिसरातील रहिवासी आहेत. दरम्यान, सोमवारी हे तिघेजण एकाच दुचाकीवरून ट्रिपल सीट जात असताना कासा- सायवन मार्गावर भरधाव कारने त्यांच्या दुचाकीला धडक दिली. या धडकेत राहुल, चिन्मय आणि मुकेश यांच्या डोक्याला आणि पायांना गंभीर दुखापत झाली. या अपघातानंतर स्थानिक लोकांनी घटनास्थळी धाव घेऊन तिघांना कासा येथील उपजिल्हा रुग्णालयात दाखल केले. मात्र, डॉक्टरांनी त्यांना मृत घोषित केले. या अपघातात एक महिला देखील जखमी झाली आहे. तिच्यावर रुग्णालयात उपचार सुरू आहेत.

या घटनेची माहिती मिळताच कासा पोलीस घटनास्थळी धाव झाले. अपघाताचे कारण अद्याप अस्पष्ट असून पोलीस याप्रकरणी अधिक तपास करीत आहेत. हा अपघात इतका भीषण होता की, इको कार जागीच उलटली. तर, दुचाकीचेही मोठे नुकसान झाले आहे. घरातील तरुण मुलांचा अपघाती मृत्यू झाल्याने परिसरात तिन्ही तरुणांच्या कुटुंबावर दु:खाचा डोंगर कोसळला आहे.