पाकिस्तानच्या नेत्याने भारताला संबोधले 'शत्रू राष्ट्र' मात्र ‘या’ गोष्टीमुळे केले कौतुक, VIDEO VIRAL
Pakistan Viral Video : पाकिस्तान तहरीक-ए-इन्साफ पक्षाचे नेते सय्यद शिब्ली फराज म्हणाले की, भारतात असा एकही आवाज नाही जो लोकसभा निवडणुकीच्या वैधतेवर प्रश्न चिन्ह उपस्थित करतो.
पाकिस्तानमधील विरोधी पक्षनेते सय्यद शिब्ली फराज यांनी भारतात नुकत्याच पार पडलेल्या सार्वत्रिक निवडणुका स्वतंत्र आणि निष्पक्ष पणे पार पाडल्याबद्दल भारताचे कौतुक केले आहे आणि आपल्या देशातही अशीच प्रक्रिया राबविण्याची इच्छा व्यक्त केली आहे.
पाकिस्तानी सिनेटमध्ये बोलताना पाकिस्तान तेहरीक-ए-इन्साफ (पीटीआय) पक्षाचे नेते फराज म्हणाले की, भारतातील एकाही व्यक्तीने लोकसभा निवडणुकीत घोटाळा झाल्याचा आरोप करत प्रश्न उपस्थित केला नाही.
मला आपल्या शत्रू देशाचे उदाहरण द्यायचे नाही. अलीकडेच तेथे (भारतात) निवडणुका झाल्या आणि ८० कोटींहून अधिक लोकांनी मतदान केले. हजारो-लाखो मतदान केंद्रे होती, काही मतदान केंद्रे तर एका ठिकाणी केवळ एका मतदारासाठी उभारण्यात आली होती. महिनाभर हा सराव ईव्हीएमच्या साहाय्याने करण्यात आला. निवडणुकीत घोटाळा झाल्याचा दावा करणारा एकही आवाज होता का,' असा सवाल सय्यद शिब्ली फराज यांनी केला.
पाहा हा व्हिडिओ:
आणि किती सुरळीत पणे सत्ता हस्तांतरित झाली. आम्हालाही तशीच परिस्थिती निर्माण करायची आहे. हा देश वैधतेसाठी लढत आहे. इथे निवडणुकीत पराभूत झालेले मान्य करत नाहीत आणि विजेताही स्वत:च्या मर्जीने निवडला जातो. अशा प्रकारच्या दृष्टिकोनामुळे आपली राजकीय व्यवस्था पोकळ झाली आहे.
लोकसभेच्या ५४३ जागांसाठी १९ एप्रिलपासून सात टप्प्यांत मतदान झाले असून शेवटचा टप्पा १ जून रोजी पार पडला असून ४ जून रोजी निकाल जाहीर करण्यात आला आहे.
केंद्रात भारतीय जनता पक्षाच्या नेतृत्वाखालील राष्ट्रीय लोकशाही आघाडीने सरकार स्थापन केले असून नरेंद्र मोदी सलग तिसऱ्यांदा पंतप्रधान झाले आहेत.
हा एक उल्लेखनीय प्रसंग होता जेव्हा भारताने निवडणुका घेतल्याबद्दल कौतुक झाले. आठवडाभरापूर्वी पाकिस्तानचे राजदूत हुसेन हक्कानी यांनीही भारतीय निवडणुका आणि तेथील लोकशाही व्यवस्थेचे कौतुक केले होते.
'भारताच्या लोकशाहीची व्याप्ती पाहून प्रभावित न होणे कठीण आहे. ४४ दिवस चाललेली निवडणूक प्रक्रिया ९०० दशलक्ष पात्र मतदार, ६४० दशलक्ष मतदार (त्यापैकी निम्म्या महिला), 6१.१ दशलक्ष मतदान केंद्रे, ५.५ दशलक्ष इलेक्ट्रॉनिक मतदान यंत्रे! हक्कानी यांनी एक्सवर पोस्ट केली.
संबंधित बातम्या