Mumbai: मुंबईत बेपत्ता झालेल्या ३ वर्षाच्या चिमुकलीचा मृतदेह नाल्यात आढळला, गोवंडी परिसरातील घटना

मिळालेल्या माहितीनुसार, आयेशा नेहल खान असे नाल्यात मृतदेह आढळलेल्या मुलीचे नाव आहे. आयेशा ही आपल्या आई-वडिलांसह गोवंडी येथील रफिक नगर परिसरात राहत होती. आयेशाच्या आजीने दिलेल्या फिर्यादीनुसार, आयेशाच्या आईने १० दिवसांपूर्वी एका बाळाला जन्म दिला आहे आणि ती अंथरुणातच आहे. दरम्यान, ६ फेब्रुवारी रोजी दुपारी १.०० वाजताच्या सुमारास आयेशा घराजवळ खेळत असताना अचानक गायब झाली. आयेशाचा शोध घेऊनही ती कुठेच न सापडल्याने घरच्यांनी शिवाजीनगर पोलीस ठाण्यात ती बेपत्ता झाल्याची तक्रार नोंदवली. पोलिसांनी परिसरातील सीसीटीव्ही फुटेज देखील तपासले, ज्यामध्ये मुलगी ९० फूट नाल्याजवळ खेळताना दिसत होती.

वरिष्ठ पोलिस निरीक्षक बापुराव देशमुख यांनी पुष्टी केली की, मुलीचा मृतदेह तिच्या कुटुंबाने ओळखला आहे. स्थानिक रहिवाशांच्या मते, हा नाला नेहमीच कचऱ्याने भरलेला असतो आणि तो कधीही साफ केला जात नाही. खेळताना नाल्यात पडल्याने आयेशाचा मृत्यू झाला असावा, असा अंदाज व्यक्त केला जात आहे. याप्रकरणी पोलीस अधिक तपास करीत आहेत.