केंद्राची सरकारी कर्मचाऱ्यांना मोठी भेट; Unified Pension Scheme ला कॅबिनेटची मंजुरी, काय आहेत वैशिष्ट्ये आणि फायदे?

जर एखाद्या कर्मचाऱ्याने किमान २५ वर्षे काम केले असेल, तर निवृत्तीपूर्वीच्या शेवटच्या  १२  महिन्यांच्या सरासरी वेतनाच्या किमान ५० टक्के रक्कम पेन्शन म्हणून त्या कर्मचाऱ्यास मिळेल. जर पेन्शनधारकाचे निधन झाले, तर त्याच्या कुटुंबाला मृत्युसमयी मिळणाऱ्या पेन्शनच्या ६० टक्के रक्कम मिळेल, अशी तरतूद या नव्या पेन्शन योजनेत करण्यात आली आहे. 

केंद्रीय मंत्री अश्विनी वैष्णव म्हणाले, 'सरकारी कर्मचाऱ्यांनी पेन्शन योजनांमध्ये काही बदल करण्याची मागणी केली आहे. यासाठी पंतप्रधान मोदीयांनी कॅबिनेट सचिव टीव्ही सोमनाथन यांच्या अध्यक्षतेखाली समिती स्थापन केली. या समितीने विविध संघटना आणि जवळपास सर्व राज्यांसोबत १०० हून अधिक बैठका घेतल्या.  रिझर्व्ह बँक ऑफ इंडिया आणि जागतिक बँकेसह सर्वांशी सल्लामसलत केल्यानंतर समितीने युनिफाइड पेन्शन योजनेची शिफारस केली आहे. आज केंद्रीय मंत्रिमंडळाने या युनिफाइड पेन्शन योजनेला मंजुरी दिली असून भविष्यात ही योजना राबविण्यात येणार आहे. केंद्र सरकारच्या सुमारे २३ लाख कर्मचाऱ्यांना युनिफाइड पेन्शन योजनेचा (यूपीएस) लाभ होणार आहे. कर्मचाऱ्यांना एनपीएस आणि यूपीएस यापैकी एकाची निवड करण्याचा पर्याय असेल, असे त्यांनी सांगितले. 

NEET PG Result declared: नीट पीजीचा निकाल जाहीर! या ठिकाणी पाहा निकाल आणि कटऑफ!

युनिफाइड पेन्शन स्कीमचे (यूपीएस) पाच स्तंभ

वैष्णव यांनी सांगितले की, यूपीएस पाच प्रमुख स्तंभांवर आधारित आहे.  पहिला आणि सर्वात महत्त्वाचा स्तंभ म्हणजे खात्रीशीर पेन्शन, जी निवृत्तीनंतरच्या उत्पन्नाची हमी देण्यासाठी सरकारी कर्मचाऱ्यांच्या प्राथमिक मागणीची थेट पूर्तता करते. खात्रीशीर कौटुंबिक पेन्शन आणि खात्रीशीर किमान पेन्शन या सह इतर स्तंभ योजनेद्वारे प्रदान केलेली आर्थिक सुरक्षा आणखी वाढवतात.

यूपीएसची वैशिष्ट्ये काय आहेत?

नवीन योजनेअंतर्गत, निवृत्तांना निवृत्तीपूर्वीच्या शेवटच्या १२ महिन्यांच्या सेवेतून त्यांच्या सरासरी मूळ वेतनाच्या ५० टक्के इतकी पेन्शन मिळेल. किमान २५ वर्षे सेवा पूर्ण केलेल्यांसाठी हा लाभ तयार करण्यात आला आहे. २५ वर्षांपेक्षा कमी परंतु १० वर्षांपेक्षा जास्त सेवा असलेल्या कर्मचाऱ्यांना पेन्शन सेवेच्या कालावधीच्या प्रमाणात असेल.

खात्रीशीर कौटुंबिक पेन्शन -

एखाद्या कर्मचाऱ्याचा मृत्यू झाल्यास, त्याच्या कुटुंबियांना पेन्शन मिळेल जी कर्मचाऱ्याला त्यांच्या मृत्यूपूर्वी त्वरित मिळत असलेल्या पेन्शनच्या ६० टक्के इतकी असेल. या तरतुदीमुळे कर्मचाऱ्याच्या आश्रितांना आर्थिक सुरक्षितता मिळते.

खात्रीशीर किमान पेन्शन -

या योजनेत कर्मचाऱ्याने किमान १० वर्षे सेवा केली असेल तर दरमहा किमान १०,००० रुपये पेन्शनची हमी दिली जाते. कमी वेतनश्रेणी असलेल्या कर्मचार् यांसाठी हा उपाय विशेषतः महत्त्वपूर्ण आहे, ज्यामुळे त्यांना निवृत्तीनंतर महागाई आणि आर्थिक अनिश्चिततेपासून सुरक्षा कवच मिळते.