तेलंगणा : अल्पवयीन मुलीवर बलात्कार, जमावाने आरोपीच्या घरात घुसून लावली आग
सोशल मीडिया पोस्टच्या माध्यमातून घटनेची माहिती मिळताच गावकऱ्यांच्या गटाने आरोपीच्या घराला आग लावली. त्यांनी एका कारचेही नुकसान केले. याप्रकरणी पोलिसांनी गुन्हा दाखल केला आहे.
तेलंगणातील सिद्दीपेट जिल्ह्यात एका अल्पवयीन मुलीवर बलात्कार केल्याच्या आरोपाखाली एका २० वर्षीय तरुणाला अटक करण्यात आली आहे. पोलिसांनी रविवारी ही माहिती दिली. मुलगी एकटी असल्याचे पाहून आरोपीने कोमुरवेली पोलिस ठाण्याच्या हद्दीत तिच्या घरात घुसून तिच्यावर लैंगिक अत्याचार केले. त्यानंतर काही गावकऱ्यांनी आरोपींच्या घरावर हल्ला करून जाळपोळ केली. या तक्रारीच्या आधारे पोक्सो (POCSO) कायद्याच्या संबंधित कलमान्वये गुन्हा दाखल करून आरोपीला अटक करण्यात आल्याची माहिती एका वरिष्ठ पोलिस अधिकाऱ्याने दिली.
मुलीला वैद्यकीय तपासणीसाठी शासकीय रुग्णालयात नेण्यात आले. पोलिसांनी पीडित मुलगी आणि तिच्या आई-वडिलांचे जबाब नोंदवले आहेत. या घटनेची माहिती सोशल मीडियावर टाकून शांतता भंग करणाऱ्या एका ग्रामस्थाविरोधात गुन्हा दाखल करण्यात आला आहे.
सोशल मीडिया पोस्टच्या माध्यमातून घटनेची माहिती मिळताच गावकऱ्यांच्या एका गटाने आरोपीच्या घरात घुसून घराला आग लावली तसेच घरांच्या सामानांची नासधूस केली. जमावाने एका कारचेही नुकसान केले. याप्रकरणी पोलिसांनी गुन्हा दाखल केला आहे. आता गावातील परिस्थिती नियंत्रणात असल्याचे पोलिसांनी सांगितले आहे. अफवांकडे लक्ष देऊ नये आणि कायदा हातात घेऊ नये, असे आवाहन त्यांनी केले.
६० वर्षीय वृद्धाचा चिमुकलीवर बलात्कार-
दुसरीकडे आसाममधील लखीमपूर जिल्ह्यात पाच वर्षांच्या मुलीवर बलात्कार केल्याच्या आरोपाखाली एका ६० वर्षीय व्यक्तीला अटक करण्यात आली आहे. पोलिसांनी शनिवारी ही माहिती दिली. ही घटना शुक्रवारी सायंकाळी हरमती परिसरात घडली. आरोपीने अल्पवयीन मुलीवर बलात्कार केला. आम्ही या प्रकरणाचा तपशील गोळा करत आहोत. मुलगी एका दुकानात आढळली. याबाबत पीडितेच्या आईने पोलीस ठाण्यात तक्रार दाखल केली आहे. पीडितेला रुग्णालयात दाखल करण्यात आले आहे. स्थानिकांनी हरमती पोलिस ठाण्याबाहेर निदर्शने करून आरोपींवर कडक कारवाई करण्याची मागणी केली.
संबंधित बातम्या