Delhi Blast : दिल्ली हादरली; सीआरपीएफच्या शाळेबाहेर स्फोट! नागरिकांमध्ये भीतीचं वातावरण

सीआरपीएफ शाळेजवळ हा स्फोट झाला. स्फोटाची माहिती मिळताच पोलिसांचे पथक घटनास्थळी दाखल झाले आणि त्यांनी या प्रकरणाचा तपास सुरू केला. स्फोटाचे कारण शोधण्यासाठी पोलिसांनी एफएसएल पथकाला घटनास्थळी पाचारण केले आहे. या दुर्घटनेत अद्याप कोणतीही जीवितहानी झालेली नाही. स्फोटानंतर आकाशात धुराचे ढग दाटून आल्याचे सांगण्यात येत आहे. घटनास्थळी पोलीस हजर आहेत. प्राथमिक तपासात अग्निशमन दलाच्या पथकाला घटनास्थळावरून सध्या काहीही आक्षेपार्ह आढळलेले नाही. एफएसएलचे पथकही याची कसून चौकशी करत आहे. याबाबत पोलिसांनी अद्याप अधिकृत वक्तव्य केलेले नाही.

शाळेजवळ आला स्फोटाचा आवाज!

पोलिसांकडून मिळालेल्या माहितीनुसार, प्रशांत विहार पोलीस ठाण्यात आज सकाळी ७ वाजून ४७ मिनिटांनी स्फोटाच्या माहितीबाबत पीसीआर कॉल आला. रोहिणी सेक्टर-१४ रोहिणी येथील सीआरपीएफ शाळेजवळ मोठ्या आवाजात हा स्फोट झाला. एसएचओ पोलिस कर्मचाऱ्यांसह तात्काळ घटनास्थळी पोहोचले. या ठिकाणी शाळेच्या भिंतीचे नुकसान झाले आणि तिथे दुर्गंध येत असल्याचे आढळले. तसेच, शेजारच्या दुकानाच्या काचा आणि दुकानाजवळ उभ्या असलेल्या कारचेही नुकसान झाल्याचे आढळून आले. मात्र, यात कोणतीही जीवितहानी झाली नाही.

सरन्यायाधीश चंद्रचूड यांची देशवासीयांना मोठी भेट, आता सर्वोच्च न्यायालयातील सर्व खटल्यांचे होणार थेट प्रक्षेपण

अद्याप कारण अस्पष्ट

त्यानंतर गुन्हे पथक, एफएसएल पथक आणि बॉम्बशोधक पथकालाही तपासासाठी घटनास्थळी पाचारण करण्यात आले. परिसरात पोलिसांकडून कसून तपासणी केली जात आहे. अग्निशमन दलाचे पथक ही घटनास्थळी दाखल झाले आहे. या स्फोटाच्या कारणांचा शोध घेतला जात आहे.

दिल्ली अग्निशमन विभागाने दिलेल्या माहितीनुसार, रोहिणी जिल्ह्यातील प्रशांत विहार भागातील सीआरपीएफच्या शाळेबाहेर स्फोट झाला. सकाळी ७ वाजून ५० मिनिटांनी अग्निशमन दलाला या घटनेची माहिती मिळाली, त्यानंतर अग्निशमन दलाच्या दोन गाड्या तात्काळ घटनास्थळी रवाना झाल्या. मात्र, या भिंतीला आग किंवा नुकसान झाल्याचे वृत्त अद्याप समोर आलेले नाही. हे पथक सातत्याने परिसरात शोधमोहीम राबवत आहे.