लॉस एंजेलिसमधील आगीपुढे अमेरिकेने गुडघे टेकले..! जोरदार वाऱ्यामुळे आगीचे शहराकडे वेगाने मार्गक्रमण, १६ जणांचा मृत्यू
Los Angeles Fire : लॉस एंजेलिसमध्ये लागलेली भीषण आग वेगाने रहिवासी भागाकडे सरकत आहे. जोरदार वाऱ्यामुळे अडचणी वाढल्या आहे. येत्या काही दिवसांत आगीवर नियंत्रण मिळवले नाही तर हजारो घरे जळून खाक होण्याची भीती आहे.
Los Angeles Fire : अमेरिकेच्या लॉस एंजेलिस काउंटीमध्ये वणव्याचा वेग रोखणे व त्यावर नियंत्रण मिळवमे अत्यंत कठीण होत चालले आहे. जोरदार वाऱ्यामुळे या समस्येत भर पडली आहे. मिळालेल्या माहितीनुसार, वाऱ्यामुळे ही आग वेगाने रहिवासी भागाच्या दिशेने सरकत आहे. ही आग शहरांपर्यंत पोहोचली तर मोठ्या प्रमाणात घरे जळून खाक होऊ शकतात. या आगीत १२ हजार घरे जळून खाक झाली आहेत. हॉलिवूड हिल्सवरील अनेक स्टार्सचे बंगलेही या आगीत जळून बेचिराख झाली आहेत. या आगीत आतापर्यंत १६ जणांचा मृत्यू झाला आहे.
मृतांपैकी अकरा जण ईटन आगीशी संबंधित होते तर पाच जण पालिसडेस भागात लागलेल्या आगीत जळून खाक झाले होते. मंगळवारी सायंकाळी लागलेल्या भीषण ईटन आगीत अल्टाडेना आणि पासाडेनाजवळील १४ हजार ११७ एकर क्षेत्र जळून खाक झाले असले तरी शनिवारी दुपारपर्यंत १५ टक्के आग आटोक्यात आली होती. लॉस एंजेलिस परिसरातील किमान पाच सक्रिय वणव्यांपैकी पॅलिसाडेस आग ही सर्वात मोठी आग आहे. ज्यात मंगळवारपासून २२,६६० एकर (९१.७ चौरस किलोमीटर) क्षेत्र जळून खाक झाले आहे आणि ५,३०० हून अधिक घरे जळून खाक झाली आहेत. आतापर्यंत ११ टक्के आग आटोक्यात आली आहे.
मंगळवार आणि बुधवारी मध्यम ते जोरदार उष्ण आणि कोरडे सांता आना वारे परतण्याची शक्यता असल्याने आग आणखी पसरण्याची शक्यता कॅल फायरने व्यक्त केली आहे. कॅलिफोर्नियाचे गव्हर्नर गॅव्हिन न्यूसम यांनी शनिवारी सांगितले की ते आग विझवण्यासाठी कॅलिफोर्निया नॅशनल गार्डची तैनाती दुप्पट करीत आहेत आणि लॉस एंजेलिसमधील आग विझविण्यासाठी सार्वजनिक सुरक्षा संसाधने तैनात करण्यात आली आहेत, सध्या या भागात १,६८० कॅलिफोर्निया नॅशनल गार्ड्समन सक्रिय आहेत.
मिळालेल्या माहितीनुसार, वाऱ्यांमुळे आग वेगाने पूर्वेकडे सरकत आहे. एवढ्या प्रयत्नांनंतरही आग आटोक्यात आणणे अवघड आहे. आग अशीच वाढत राहिली तर गेट्टी सेंटर आर्ट म्युझियम आणि दाट लोकवस्तीच्या सॅन फर्नांडो व्हॅलीलाही मोठे नुकसान होऊ शकते.
आग विझवण्यासाठी पाण्याचीही टंचाई -
आग विझवण्याच्या प्रयत्नांदरम्यान पाण्याबाबतही वाद सुरू आहे. लॉस एंजेलिसमधील हॉलिवूड स्टार्सची घरे आणि बंगले पाण्याअभावी कसे उद्ध्वस्त झाले, याची चौकशी व्हायला हवी, असे कॅलिफोर्नियाच्या गव्हर्नरांनी म्हटले आहे. अनेक ठिकाणी आगीदरम्यान लूटमारीच्या घटनाही घडल्या आहेत. अशा तऱ्हेने सेंट मोनिकामध्ये संचारबंदी जाहीर करण्यात आली आहे.
संबंधित बातम्या