Live News Updates 4 May 2023: शरद पवार कार्यकर्त्यांना भेटले, एक-दोन दिवसांत निर्णय घेण्याचं आश्वासन

राज्यातील सत्तासंघर्षावर येत्या काही दिवसांत सुप्रीम कोर्टातून निकाल येणार आहे. मुख्यमंत्री एकनाथ शिंदे यांच्यासह शिवसेनेतील १६ आमदारांच्या अपात्रतेबाबतही कोर्ट निकाल देणार असल्यामुळं महाराष्ट्रासह संपूर्ण देशाचं लक्ष निकालाकडे आहे. त्यातच आता कृषिमंत्री अब्दुल सत्तार यांनी कोर्टाचा निकाल हसत-खेळत मान्य करणार असल्याचं म्हटलं आहे. आम्ही राहिलो आणि गेलो तरी इतिहास लिहिला जाणार आहे. आमच्या बाबतीत होणारा निर्णय देशासाठी लागू होणार आहे. त्यामुळं कोर्टाचा सुप्रीम निर्णय आम्ही आनंदाने मान्य करू, असं सत्तार यांनी म्हटलं आहे.

मुख्यमंत्री एकनाथ शिंदे यांनी आज राजभवन येथे जाऊन राज्यपाल रमेश बैस यांची भेट घेतली. राज्यपाल बैस यांनी माजी राष्ट्रपती रामनाथ कोविंद यांच्या सन्मानार्थ स्नेहभोजनाचे आयोजन केले होते. या स्नेहभोजनासाठी मुख्यमंत्री शिंदे यांना राज्यपालांनी आमंत्रित केले होते. 

पाकिस्तानचे परराष्ट्र मंत्री बिलावल भुट्टो झरदारी यांचे आज गोव्यात आगमन झाले. शांघाई कोऑपरेशन ऑर्गनायजेशनच्या बैठकीसाठी भुट्टो जरदारी गोव्यात आले आहेत.

राज्यासमोरील प्रश्नांसदर्भात राज्यपाल रमेश बैस यांची काँग्रेस शिष्टमंळानं भेट घेऊन दोन दिवसीय विशेष अधिवेशन बोलवण्याचे निर्देश राज्य सरकारला द्यावेत अशी विनंती करण्यात आलेली आहे. राज्याच्या हितासाठी राज्यपाल काँग्रेसच्या मागणीचा सहानुभूतीनं विचार करतील अशी अपेक्षा आहे. विशेष अधिवेशन बोलावलं नाही तर काँग्रेस जनतेच्या प्रश्नांसाठी राज्यभर रस्त्यावर उतरुन तीव्र आंदोलन करेल, असा इशारा काँग्रेसचे प्रदेशाध्यक्ष नाना पटोले यांनी दिला आहे.

मुंबईत चव्हाण सेंटरबाहेर आंदोलन करणाऱ्या कार्यकर्त्यांना शरद पवार भेटले. कार्यकर्त्यांशी आधी बोललो असतो तर तुम्ही मला परवानगी दिली नसती. एक ते दोन दिवसांत कार्यकर्त्यांच्या मनातील भावना दुर्लक्षित केली जाणार नाही. दोन दिवसांनंतर तुम्हाला असं बसावं लागणार नाही. शरद पवारांच कार्यकर्त्यांना आश्वासन

जम्मू काश्मीरच्या किश्तवार जिल्ह्यात आज सकाळी लष्कराचं हेलिकॉप्टर कोसळून अपघात झाला. या अपघातानंतर हेलिकॉप्टरमधील दोन्ही पायलट सुरक्षित असून एक पायलट किरकोळ जखमी झाला आहे. एएलएच ध्रूव हे लष्कराचे हेलिकॉप्टर नियमीत उड्डाण करत असताना त्याचे हवाई वाहतूक नियंत्रण यंत्रणेशी संपर्क तुटले. त्यानंतर लष्कर, सशस्त्र सीमा बल आणि पोलिसांच्या मदतीने या हेलिकॉप्टरचा शोध घेण्यात आला.

ईशान्येकडील मणिपूर राज्यात स्थानिक आदिवासींच्या मोर्चाला हिंसक वळण लागल्याने मोठ्या प्रमाणावर जाळपोळ सुरू झाली आहे. राज्यात आठ जिल्ह्यांमध्ये संचारबंदी लागू करण्यात आली असून इंटरनेट सेवा बंद करण्यात आली आहे. 

मागील काही दिवसांपासून शेअर बाजारात तेजी असून हेच चित्र आजही कायम आहे. आज सकाळपासूनच सेन्सेक्स आणि निफ्टीची वाटचाल सकारात्मक राहिली आहे. सेन्सेक्स १३० अंकांनी व निफ्टी ४० अंकांनी वधारला आहे.

Uddhav Thackeray : बिहार विधानपरिषदेचे सभापती देवेशचंद्र ठाकूर हे आज दुपारी १ वाजता मातोश्री निवासस्थानी उद्धव ठाकरे यांची सदिच्छा भेट घेणार आहेत. आमदार कपिल पाटील हेही यावेळी त्यांच्या सोबत असतील.

मुंबई : राज्यात सध्या मोठ्या राजकीय हालचाली सुरू आहे. शरद पवार यांनी राजीनामा दिल्यावर राज्यात मोठ्या राजकीय घडामोडी सुरू आहेत. भाजपने देखील या घटनेची दखल घेतली आहे. राज्यातील सुरू असलेल्या घडामोडीवर दिललीवरून लक्ष ठेवण्यात येत आहे. या पार्श्वभूमीवर भाजपच्या पक्षप्रमुखांनी केंद्रीय कायदामंत्री किरेन रिजिजू हे राज्यात येत त्यांनी मुंबईत विधानसभाध्यक्ष राहुल नार्वेकर यांची भेट घेतली. त्यांनी राज्यातील परिस्थिती बाबत चर्चा केली. येत्या काळात उद्भवणाऱ्या परिस्थिती बाबत काय तयारी करता येईल याची देखील चर्चा झाल्याचे समजते.

दिल्लीत सुरु असलेल्या कुस्तीपटुंच्या आंदोलनाला पुण्यातील कुस्तीपटू प्रतिकात्मक कुस्त्या खेळून पाठिंबा देणार आहेत. एस पी कॉलेज समोर या प्रतिकात्मक कुस्त्यांचे कॉंग्रेस पक्षाकडून आयोजन करण्यात आले आहे.

 हसन मुश्रीफ यांच्या तिन्ही मुलांनी ईडीच्या प्रकरणात अटकपूर्व जामीनासाठी दाखल केलेल्या याचिकेवर आज सुनावणी होणार आहे.

 राजकीय सामाजिक गुन्हे किंवा खटले काढून घेण्यासाठी राज्यपातळीवर आंदोलनाबाबत सुजात आंबेडकर यांची पत्रकार परिषद होणार आहे.

 राष्ट्रवादीचे ओबीसी सेलचे पदाधिकारी आज एकत्रितरित्या शरद पवार यांना आपल्या पदाचे राजीनामे स्वतः भेटून देणार आहेत. पक्ष संघटना बळकट करायची असेल तर शरद पवार हेच अध्यक्ष आहेत अशी या सर्व कार्यकर्त्यांची मागणी आहे.

धमतरी : छत्तीसगडमधील धमतरी राष्ट्रीय महामार्ग ३० वर बुधवारी रात्री भीषण अपघात झाला. बोलेरो आणि ट्रकची भीषण धडक झाली. हा अपघात एवढा भीषण होता की १० जणांचा जागीच मृत्यू झाला. नशीब बलवत्तर म्हणून एक चिमुकली या अपघातातून बचवली आहे. या अपघाताची माहिती, मुख्यमंत्री भूपेश बघेल यांनी ट्विट करून दिली आहे. त्यांनी चिमुकली लवकर बरी व्हावी यासाठी प्रार्थना केली, तर अपघातात मृत्युमुखी झालेल्या कुटुंबाप्रती शोक व्यक्त केला.

राज्यातील मोठं देवस्थान असलेल्या शेगाव  येथील संत गजानन महाराज संस्थांनाकडून 2001 साली तत्कालीन विश्वस्त शिवशंकर भाऊ पाटील यांच्या संकल्पनेतून   'आनंद सागर' हे  पर्यटन आणि धार्मिक केंद्र  आजपासून सुरू होणार आहे.  पुढील काळात टप्प्याटप्प्यानं भाविकांसाठी इतरही काही सोयी सुविधा याठीकणी सुरू होणार  आहे.

राज्यात १६ सप्टेंबर २०१७ पासून वस्तू व सेवा कर (जीएसटी) अधिनियम लागू करण्यात आला. या दिनांकापासून ते राज्य शासनाचे करमणूक शुल्क आकारणी व वसुलीचे अधिकार स्थानिक प्राधिकरणाकडे हस्तांतरित करण्याच्या दिनांकापर्यंतच्या कालावधीसाठी करमणूक शुल्क आकारणीतून सूट देण्याचा निर्णय आज झालेल्या मंत्रिमंडळ बैठकीत घेण्यात आला. बैठकीच्या अध्यक्षस्थानी मुख्यमंत्री एकनाथ शिंदे होते. महसुल व वन विभागाच्या ०१ जुलै २०१७ च्या निर्णयानुसार करमणूक शुल्क भरण्यापासून १५ सप्टेंबर, २०१७ पर्यंत दिलेली सूट पुढे १६ सप्टेंबर, २०१७ पासून ३० सप्टेंबर, २०२६ पर्यंतच्या कालावधीसाठी सुरू ठेवण्यास मंत्रिमंडळ बैठकीत मान्यता देण्यात आलेली आहे.

राष्ट्रीय सफाई कर्मचारी आयोगाचे सदस्य डॉ. पी. पी. वावा यांच्या अध्यक्षतेखाली विधानभवनात आयोजित बैठकीत सफाई कर्मचाऱ्यांच्या समस्यांबाबत विविध विभागांकडील कार्यवाहीचा आढावा घेण्यात आला. विभागीय आयुक्त सौरभ राव यांच्या प्रमुख उपस्थितीत झालेल्या या बैठकीस पिंपरी- चिंचवड मनपा आयुक्त शेखर सिंह, पुणे महानगरपालिकेचे अतिरिक्त आयुक्त डॉ. कुणाल खेमणार, राष्ट्रीय सफाई कर्मचारी आयोगाचे सल्लागार गिरेंद्र नाथ, पिंपरी चिंचवड मनपा अतिरिक्त आयुक्त जितेंद्र वाघ, बी. जे. वैद्यकीय महाविद्यालयाचे उप अधीष्ठाता डॉ. नरेश झांजड आदींसह सफाई कर्मचारी संघटनांचे प्रतिनिधी उपस्थित होते.

 सामाजिक न्याय व विशेष सहाय्य विभागामार्फत अनुसूचित जाती प्रवर्गातील विद्यार्थ्यांना देण्यात येणाऱ्या विविध मॅट्रीकोत्तर शिष्यवृत्ती योजनांकरीता सन २०२२-२३ मध्ये नवीन व नुतनीकरण अर्ज करण्यासाठी प्रक्रियेस ३० मे २०२३ पर्यंत मुदतवाढ देण्यात आली आहे. यासाठी विद्यार्थ्यांनी https://mahadbt.maharashtra.gov.in या संकेतस्थळाचा वापर करून अर्ज भरावा, असे आवाहन समाज कल्याण आयुक्त डॉ. प्रशांत नारनवरे यांनी केले आहे.

Russia Ukraine War: रशिया आणि युक्रेनमध्ये युद्ध सुरू आहे. या युद्धाला तब्बल १ वर्ष झाले आहे. आता युक्रेनने थेट रशियात घुसून रशियाचे अध्यक्ष पुतीन यांच्या घरावर ड्रोन हल्ला करत त्यांना जीवे मारण्याचा प्रयत्न केला आहे. या घटनेचा व्हिडिओ देखील व्हायरल झाला आहे. यामुले संतप्त झालेल्या रशियाने युक्रेनवर एयर स्ट्राईक केला. यात १६ जण ठार झाल्याची माहिती मिळत आहे.