लॉरेन्स बिश्नोई LAW चा होता विद्यार्थी, कसा बनला गुन्हेगारी जगताचा बादशहा; पंजाबमधील ‘ती’ निवडणूक ठरली कारणीभूत

लॉरेन्सच्या नेटवर्कमध्ये ७०० हून अधिक शॉर्प शूटर असल्याचे मानले जाते, जे देश-विदेशात पसरलेले आहेत. तर त्याच्यावर ७५ हून अधिक गुन्हे दाखल आहेत. २०१४ पासून तो गुजरातमधील साबरमती तुरुंगात कैद आहे.

लॉरेन्स बिश्नोई कसा बनला इतका शक्तिशाली -

लॉरेन्सची गुन्हेगारी विश्वात २००८ साली प्रवेश झाल्याचे म्हटले जााते. १२ फेब्रुवारी १९९२ रोजी पंजाबच्या फाजिल्का जिल्ह्यात जन्मलेल्या लॉरेन्सने २००७ मध्ये पंजाब विद्यापीठात प्रवेश घेतला. कायद्याचे शिक्षण घेण्यासाठी तो महाविद्यालयात गेला आणि तेथील विद्यार्थी राजकारणाचा भाग बनला. पुढच्याच वर्षी त्यांचा मित्र रॉबिन बरार याने विद्यार्थी परिषदेची निवडणूक लढवण्याचा निर्णय घेतला.

रिपोर्टनुसार, निवडणुकीदरम्यान लॉरेन्सने ब्रार यांच्या परवानाधारक बंदुकीने आपल्या प्रतिस्पर्ध्यावर गोळ्या झाडल्या. यानंतर त्याला कलम ३०७ अन्वये प्रथमच तुरुंगात जावे लागले. मात्र, दोन महिन्यांनंतर त्याची तुरुंगातून सुटका झाली. तुरुंगात असताना मोठ्या गुन्हेगारांशी त्याची मैत्री झाली असे मानले जाते.

निवडणूक हरला व पुन्हा जिंकला -

२०१० मध्ये लॉरेन्सने स्टुडंट कौन्सिलच्या अध्यक्षपदाची निवडणूक लढवली, पण त्याचा पराभव झाला. यानंतर त्याच्या साथीदारांनी विजेत्याला जोरदार मारहाण केली आणि त्याचा परिणाम असा झाला की लॉरेन्स पुन्हा तुरुंगात पोहोचला. पुढच्याच वर्षी त्याने पुन्हा निवडणूक लढवली आणि अध्यक्ष झाला. इथूनच त्याची गोल्डी ब्रारसोबत ओळख झाली, असे मानले जाते. सिद्धू मूसेवाला हत्या प्रकरणातही गोल्डीचे नाव समोर आले होते.

 जीवे मारण्याच्या धमक्या येत असताना सलमान खानच्या वडिलांनी खरेदी केली लग्झरी कार

सलमान खानला मारायला गेला लॉरेन्सचा मित्र -

गोल्डी आणि लॉरेन्स यांनी पंजाबमध्ये छोट्या छोट्या निवडणुका लढवायला सुरुवात केली. कॉलेजमधून पदवी घेतल्यानंतर लॉरेन्सने विद्यार्थी राजकारणात राहण्यासाठी एक टोळी तयार केली, ज्यात त्याचा मित्र संपत नेहराचाही समावेश होता. विशेष म्हणजे २०१८ मध्ये नेहरा सलमान खानला मारण्याच्या इराद्याने मुंबईत पोहोचला होता, पण नंतर त्याला अटक करण्यात आली होती.

रिपोर्टनुसार , २०१३ मध्ये पंजाबमध्ये एका महाविद्यालयीन निवडणुकीत लॉरेन्स समर्थित उमेदवार निवडणुकीत पराभूत झाला तेव्हा त्याने विजेत्याच्या हत्येचे आदेश दिले होते. लखनौ महापालिका निवडणुकीत मित्राच्या नातेवाईकाविरोधात उभ्या असलेल्या उमेदवाराला ठार मारण्याचे आदेशही त्याने दिले होते.

सलमानला मारण्याचा प्लान -

२०१८ मध्ये लॉरेन्सने पहिल्यांदा सलमान खानच्या हत्येची योजना आखली होती आणि नेहरावर हे काम सोपवले होते. लांब पल्ल्याच्या शस्त्रास्त्रांअभावी तो ही योजना अंमलात आणू शकला नाही, असे बोलले जाते. मिळालेल्या माहितीनुसार, मूसेवाला यांच्या हत्येभोवती सलमानला दुसऱ्यांदा ठार मारण्याचा कट रचला गेला होता. त्याचवेळी तिसरा प्रयत्न गोल्डीने केला आणि शूटर्सने सलमानच्या घराची रेकीही केली. मात्र, पोलिसांनी हा कट हाणून पाडला.