आपला शत्रू एकच… शुक्रवारच्या नमाजानंतर इराणचे सर्वेसर्वा खामेनी यांची मुस्लिम राष्ट्रांना साद

गेल्या पाच वर्षांतील खामेनी यांचं हे पहिलंच जाहीर भाषण होतं. रायफल सोबत ठेवूनच ते बोलत होते. या भाषणातून त्यांनी इस्रायलवर जोरदार शाब्दिक हल्ला चढवला. मुस्लिम देशांचा एकच शत्रू असून त्यांना एकजुटीनं पराभूत करायचं आहे, असं ते म्हणाले. हिजबुल्लाहचा म्होरक्या नसरल्लाहच्या मृत्यूनंतर इराणनं इस्रायलवर क्षेपणास्त्र डागल्याच्या भूमिकेचं खामेनी यांनी जोरदार समर्थन केलं. इराणच्या सैन्यानं केलेला हा हल्ला अत्यंत योग्य आणि कायदेशीर होता, असं ते म्हणाले.

हेही वाचा: २०० क्षेपणास्त्रे डागल्यानंतर इराणचा नवा प्लान लीक! नेतन्याहू यांच्यासह इस्रायलचे ५ टॉप नेते रडारवर

'इस्रायलला प्रत्युत्तर देण्यास आम्ही उशीर करणार नाही, पण घाई देखील करणार नाही. इराणनं इस्रायलवर क्षेपणास्त्र हल्ले केल्यानंतर पहिल्यांदाच त्यांनी ही प्रतिक्रिया दिली. गेल्या वर्षी ७ ऑक्टोबरला हमासनं इस्रायलवर दहशतवादी हल्ला केला होता, त्यानंतर मध्यपूर्वेतील तणाव वाढला होता. इस्रायलनं गाझा पट्टीत हमासवर जोरदार प्रतिहल्ला केला आणि त्यानंतर लेबनॉनमधील हिजबुल्लाहला लक्ष्य केलं. यावेळी हिजबुल्लाहचा म्होरक्या नसरल्लाही मारला गेला. नसरल्लाच्या मृत्यूनंतर इराण आणि इस्रायलमधील तणाव शिगेला पोहोचला आहे.

इस्रायल कधीच जिंकू शकणार नाही!

'हिजबुल्लाह आणि हमासच्या विरोधातील युद्ध इस्रायल कधीच जिंकू शकणार नाही', असा दावा त्यांनी केला. त्यांनी लेबनॉन आणि पॅलेस्टिनी लढवय्यांना देखील धीर दिला. 'रक्तपाताला घाबरून तुमची ताकद कमी होऊ देऊ नका. इस्रायल हिजबुल्ला आणि हमासवर कधीही विजय मिळवू शकणार नाही. इस्रायलच्या अलीकडच्या वर्तनामुळं संताप वाढत आहे आणि लढण्याचा निर्धार आणखी घट्ट होत आहे. इस्रायल नागरिकांच्या हत्या करून विजयाचा दिखावा करत आहे. इस्रायलचं संरक्षण करण्यामागचा अमेरिकेचा हेतू हा या प्रदेशातील नैसर्गिक साधनसंपत्ती बळकावण्याचा आहे, अशा शब्दांत त्यांनी अमेरिकेवरही निशाणा साधला.

हेही वाचा: इस्रायल-इराण युद्धामुळं उडणार महागाईचा भडका! भारतासह जगभरात 'या' वस्तू महागणार