इराणने मान्य केली भारताची विनंती, युद्धात अडकलेल्या हजारो भारतीयांना दिलासा

इराणमध्ये अडकलेल्या किमान १० हजार नागरिकांना सुरक्षित बाहेर काढण्यासाठी सुरक्षित मार्ग उपलब्ध करून देण्याच्या भारताच्या विनंतीला इराणने सोमवारी प्रतिसाद दिला. भारताच्या विनंतीला उत्तर देताना इराणने म्हटले आहे की, सध्या देशाची हवाई हद्द बंद असल्याने विद्यार्थी अझरबैजान, तुर्कमेनिस्तान आणि अफगाणिस्तानमार्गे परत येऊ शकतात.

इराणमधील भारतीय दूतावासाने रविवारी परिस्थितीवर सातत्याने लक्ष ठेवून असल्याची माहिती दिली होती. इराणमधील विद्यार्थ्यांच्या सुरक्षेसाठी दूतावास सातत्याने संपर्कात आहे. काही प्रकरणांमध्ये दूतावासाच्या मदतीने विद्यार्थ्यांना इराणमधील सुरक्षित ठिकाणी हलवण्यात येत आहे, असे भारतीय दूतावासाने एका निवेदनात म्हटले आहे. इतर संभाव्य पर्यायांचाही विचार केला जात आहे. ”