काश्मीरच्या थंडगार वातावरणात प्रवाशांचा होणार गरमागरम प्रवास! हीटरची सुविधा असलेली धावणार Vande Bharat स्लीपर ट्रेन
Jammu Kashmir Vande Bharat : नवी दिल्ली ते श्रीनगर दरम्यान एक विशेष स्लीपर ट्रेन चालवण्यात येणार आहे, ज्याद्वारे तुम्ही हे अंतर १३ तासात पार करू शकाल. या मार्गावर ही गाडी बर्फाच्छादित टेकड्यांमधूनही जाणार असून, हा एक उत्तम अनुभव असेल.
Jammu Kashmir Vande Bharat : भारतीय रेल्वे जम्मू-काश्मीरसाठी दोन विशेष ट्रेन चालवण्याच्या तयारीत आहे. येत्या काही महिन्यांत काश्मीरशी कनेक्टिव्हिटी वाढवण्याची योजना असल्याचे सांगण्यात येत आहे. त्याअंतर्गत नवी दिल्ली ते श्रीनगर दरम्यान विशेष स्लीपर ट्रेन चालवण्यात येणार आहे. ही एक सेंट्रल हीटेड ट्रेन असेल, ज्याद्वारे तुम्ही हे अंतर १३ तासात पार करू शकाल. या मार्गावरील बर्फाच्छादित टेकड्यांमधूनही ही गाडी जाणार आहे. तसेच जगातील सर्वात उंच रेल्वे आर्क ब्रिज असलेल्या चिनाब पुलावरून ही गाडी जाण्याचा अनुभव घेईल.
नवी दिल्ली ते श्रीनगर या ट्रेनमध्ये तुम्हाला मोठा दिलासा मिळणार असला तरी सेकंड क्लास स्लीपर कोचची सुविधा दिली जाणार नाही, अशी माहिती सूत्रांनी दिली. पूर्वी ही वंदे भारत स्लीपर ट्रेन काश्मीरमधूनही जाईल, असे मानले जात होते, पण सध्या तरी तसे होताना दिसत नाही. कटरा-बारामुल्ला मार्गाबाबत बोलायचे झाले तर ८ डब्यांची वंदे भारत ट्रेन चालवण्यात येणार असून, त्यात चेअर कार बसण्याची सुविधा असेल. टीओआयच्या वृत्तात रेल्वेच्या एका वरिष्ठ अधिकाऱ्याच्या हवाल्याने ही माहिती देण्यात आली आहे.
विशेष फिचर्स असलेली वंदे भारत ट्रेन -
जम्मू-काश्मीरसाठी धावणाऱ्या वंदे भारत एक्स्प्रेसमध्ये काही खास वैशिष्ट्ये असतील. बर्फ जमू नये म्हणून पाण्याच्या टाकीसाठी सिलिकॉन हीटिंग पॅड असतील. स्वच्छतागृहांमध्ये उबदार हवेचा संचार असेल. वंदे भारत ट्रेन धावल्याने कटरा-बारामुल्ला दरम्यानचे २४६ किलोमीटरचे अंतर साडेतीन तासांपर्यंत कमी होणार आहे.
सध्या बसने दोन शहरांमधील अंतर कापण्यासाठी सुमारे १० तास लागतात. बारामुल्ला रेल्वे स्थानक श्रीनगरपासून ५७ किमी अंतरावर आहे. त्यामुळे लवकरच जम्मू-काश्मीरच्या जनतेला भारतीय रेल्वेकडून मोठी भेट मिळणार आहे. यामुळे वाहतुकीची सोय वाढेल आणि विकासाला बळ मिळेल.
संबंधित बातम्या