चीननंतर आता भारताची तुर्कीवर मोठी कारवाई; TRT वर्ल्डचे सोशल मीडिया हँडल ब्लॉक

सूत्रांनी दिलेल्या माहितीनुसार, टीआरटी वर्ल्ड आणि ग्लोबल टाइम्सवर भारताविरोधात दिशाभूल करणारा आणि प्रक्षोभक मजकूर पसरवल्याचा आरोप आहे. या पाकिस्तानसमर्थक देशांचे न्यूज पोर्टल्स त्यांच्या सोशल मीडिया हँडलच्या माध्यमातून भारताच्या ऑपरेशन सिंदूरशी संबंधित खोट्या बातम्या पसरवताना आढळले.

भारत सरकारची मोठी कारवाई -

भारत सरकारने सोशल मीडिया प्लॅटफॉर्म एक्सला आंतरराष्ट्रीय वृत्तसंस्था आणि प्रमुख वापरकर्त्यांसह ८,००० हून अधिक खाती ब्लॉक करण्याचे आदेश दिले आहेत. ही खाती चुकीची माहिती पसरवत आहेत ज्यामुळे राष्ट्रीय सुरक्षा, परराष्ट्र संबंध आणि सामाजिक सलोखा बिघडू शकतो, असे सरकारने म्हटले आहे. टीआरटी वर्ल्ड आणि ग्लोबल टाईम्सचे अकाऊंट या कारवाईचा भाग आहेत.

पाकिस्तान समर्थक प्रचार केल्याचा आरोप -

ग्लोबल टाईम्स आणि इतर काही अकाऊंटवर पाकिस्तानसमर्थक प्रचाराला प्रोत्साहन दिल्याचा आरोप करण्यात आला आहे. अलीकडच्या काळात भारत-पाकिस्तान तणावाच्या पार्श्वभूमीवर चुकीच्या माहितीचा प्रसार झपाट्याने वाढला आहे. तुर्कस्तानची टीआरटी वर्ल्ड जागतिक बातम्या आणि तुर्कस्तानचा दृष्टिकोन मांडण्याचा दावा करते. त्यांच्यावर भारतविरोधी कव्हरेजचा ही आरोप आहे. प्रादेशिक स्थैर्य राखण्यासाठी आणि परकीय प्रचार रोखण्यासाठी भारताने हे पाऊल उचलले असल्याचे विश्लेषकांचे मत आहे.

पाकिस्तानचा समर्थक आहे तुर्की -

ऑपरेशन सिंदूरदरम्यान तुर्कस्तानने उघडपणे पाकिस्तानला पाठिंबा दिल्याने भारत आणि तुर्कस्तानमधील तणाव वाढला आहे. ऑपरेशन सिंदूर 7-8 मे 2025 च्या रात्री सुरू झाले. पाकिस्तान आणि पाकव्याप्त काश्मीरमधील दहशतवादी तळांना लक्ष्य करण्यासाठी ही अचूक आणि नियंत्रित लष्करी कारवाई होती. पहलगाम येथे २२ एप्रिल रोजी झालेल्या दहशतवादी हल्ल्यात २६ निरपराध नागरिक ठार झाल्यानंतर ही कारवाई करण्यात आली. भारतीय लष्कराने ऑपरेशन सिंदूर अंतर्गत जैश-ए-मोहम्मद आणि लष्कर-ए-तोयबासारख्या संघटनांच्या छावण्यांसह नऊ दहशतवादी तळ उद्ध्वस्त केले. भारताने ही कारवाई अप्रक्षोभक आणि दहशतवादाविरोधातील जबाबदार पाऊल असल्याचे म्हटले आहे. मात्र, तुर्कस्तानने या कारवाईचा निषेध करत पाकिस्तानचे समर्थन केले आहे.

तुर्कस्तानच्या परराष्ट्र मंत्रालयाने 7 मे रोजी एक निवेदन जारी करून ऑपरेशन सिंदूर ला "चिथावणीखोर पाऊल" म्हटले आणि म्हटले की यामुळे संपूर्ण युद्धाचा धोका वाढला आहे. तुर्कस्तानने भारत आणि पाकिस्तान या दोन्ही देशांना संयम बाळगण्याचे आवाहन केले, पण त्याचवेळी पहलगाम हल्ल्याच्या चौकशीच्या पाकिस्तानच्या मागणीचे समर्थन केले. तुर्कीचे राष्ट्राध्यक्ष रेसेप तैय्यप एर्दोगान यांनी पाकिस्तानचे पंतप्रधान शहबाज शरीफ यांच्याशी दूरध्वनीवरून चर्चा करून पाकिस्तानसोबत एकजूट व्यक्त केली. शरीफ यांनी एर्दोगन यांचे आभार मानले आणि तुर्कस्तानच्या अढळ पाठिंब्याचे कौतुक केले.

तुर्कीकडून सैन्य सहायता आणि ड्रोन वाद -

ऑपरेशन सिंदूरनंतर पाकिस्तानने भारताविरोधात तुर्की बनावटीच्या 'एसेस गार्ड सोंगर' ड्रोनचा वापर करत भारताच्या हवाई हद्दीचे उल्लंघन करण्याचा प्रयत्न केला. भारतीय सैन्याने हे ड्रोन निष्क्रिय केले, पण या घटनेमुळे तुर्कस्तान-पाकिस्तान संबंध उघड झाले. तुर्कस्तानने पाकिस्तानला नैतिक, आर्थिक आणि लष्करी पाठबळ दिले आहे, ज्यात शस्त्रास्त्रांचा पुरवठा करणे आणि काश्मीर प्रश्नावर पाकिस्तानच्या भूमिकेचे समर्थन करणे समाविष्ट आहे.

भारतात तुर्कीविरोधात लोकांमध्ये राग -

तुर्कस्तानच्या या निर्णयामुळे भारतात प्रचंड संतापाची लाट उसळली आहे. सोशल मीडियावर #BoycottTurkey ट्रेंड होत असून, भारतीयांनी तुर्कस्तानला जाऊन तुर्कीच्या उत्पादनांवर बहिष्कार टाकण्याचे आवाहन केले आहे. २०२३ च्या भूकंपात भारताने तुर्कस्तानला केलेल्या मदतीचा दाखला देत अनेकांनी तुर्कस्तानला कृतघ्न म्हटले आहे, ज्याला 'ऑपरेशन दोस्त' असे नाव देण्यात आले आहे.