आजच्याच दिवशी हिरोशिमावर अनेरिकेने टाकले 'लिटिल बॉय', एका क्षणात हजारो लोकांची झाली वाफ, १.४० लाख मृत्यू

जपानमधील हिरोशिमावर टाकण्यात आलेल्या बॉम्बला 'लिटिल बॉय' असे नाव देण्यात आले होते. अमेरिकेच्या हवाई दलाने सकाळी सव्वाआठ वाजता ते पाडले. क्षणार्धात संपूर्ण शहर जळून खाक झाले. एका अंदाजानुसार, स्फोटानंतर लगेचच सुमारे 70,000 लोकांचा मृत्यू झाला आणि पुढील काही महिन्यांत 70,000 हून अधिक लोक रेडिएशन आणि जखमांमुळे मरण पावले. सरकारी आकडेवारीनुसार या हल्ल्यात 1.40 लाखांहून अधिक लोकांचा मृत्यू झाला होता.

हल्ल्याचे कारण

दुसऱ्या महायुद्धाच्या शेवटच्या टप्प्यात हा हल्ला झाला. जपानला शरण येण्यास भाग पाडण्याच्या उद्देशाने अमेरिकेने हे पाऊल उचलले. मात्र त्यानंतर अवघ्या तीन दिवसांनी म्हणजे ९ ऑगस्ट रोजी नागासाकीवर दुसरा अणुहल्ला झाला, त्यानंतर १५ ऑगस्ट १९४५ रोजी जपानने शरणागती पत्करली आणि दुसरे महायुद्ध संपले.

हिरोशिमा : तेव्हा आणि आता

जळून खाक झालेले हे शहर शांतता आणि अहिंसेचे प्रतीक बनले आहे. हिरोशिमा दिन दरवर्षी 6 ऑगस्ट रोजी जपानसह जगभरात साजरा केला जातो. अण्वस्त्रांच्या वापराची पुनरावृत्ती कधीही होऊ नये, असा इशारा जगाला देणे हा त्याचा उद्देश आहे. हिरोशिमा पीस मेमोरियल पार्कमध्ये आजही लोक मेणबत्त्या पेटवून आणि प्रार्थना करून त्या दिवशी प्राण गमावलेल्या निरपराध लोकांना श्रद्धांजली अर्पण करतात.