Hathras Stampede : हाथरस दुर्घटनेत ‘भोले बाबा’ला क्लिन चीट, ‘या’ एका चुकीमुळे सत्संग आयोजकांवर गुन्हे दाखल
hathras stampede case : हाथरस चेंगराचेंगरीत मृतांचा आकडा १२१ वर पोहोचला असून २८ जण जखमी झाल्याची माहिती प्रशासनाने दिली आहे.
हाथरसमध्ये झालेल्या चेंगराचेंगरीत मृतांचा आकडा १२१ वर पोहोचला आहे. या प्रकरणी सत्संग आयोजकांविरोधात उत्तर प्रदेश पोलिसांनी बुधवारी एफआयआर दाखल केला आहे. मात्र, एफआयआरमध्ये आकार विश्व हरी भोळे बाबा म्हणून ओळखले जाणारे बाबा नारायण हरी यांचे नाव आरोपी म्हणून नाही.
सिकंदरा राव पोलीस ठाण्यात दाखल करण्यात आलेल्या एफआयआरमध्ये 'मुख्य सेवादार' देवप्रकाश मधुकर आणि अन्य आयोजकांची नावे आहेत, अशी माहिती एका वरिष्ठ अधिकाऱ्याने दिली.
भारतीय न्याय संहिता कलम १०५ (सदोष मनुष्यवध), ११० (सदोष मनुष्यवधाचा प्रयत्न), १२६ (२) (चुकीच्या पद्धतीने रोखणे), २२३ (सरकारी कर्मचाऱ्याच्या आदेशाचा अवमान करणे), २३८ (पुरावे नष्ट करणे) अंतर्गत एफआयआर दाखल करण्यात आला आहे.
बुधवारी झालेल्या या दुर्घटनेत मृतांचा आकडा १२१ वर पोहोचला असून २८ जण जखमी झाल्याची माहिती मदत आयुक्त कार्यालयाने दिली.
हाथरस सत्संग चेंगराचेंगरी प्रकरणी एफआयआरमधील माहिती -
- चेंगराचेंगरी प्रकरणी दाखल एफआयआरनुसार, हाथरस जिल्ह्यातील फुलराई मुगलगढी गावात जीटी रोडजवळ नारायण हरी, साकार विश्व हरिभोले बाबा किंवा 'भोले बाबा' या नावांनी ओळखला जाणारा सूरज पाल याने सत्संग आयोजित केला होता.
- देवप्रकाश मधुकर यांनी प्रशासनाकडे सुमारे ८० हजार लोकांसाठी परवानगी मागितली होती आणि त्यानुसार प्रशासनाने वाहतूक व सुरक्षेची व्यवस्था केली होती. मात्र, सत्संगाला सुमारे अडीच लाख लोक जमल्याने रस्त्यावर वाहतुकीस अडचण निर्माण झाली आणि वाहनांची वाहतूक ठप्प झाली, असे एफआयआरमध्ये नमूद करण्यात आले आहे.
- सत्संग संपल्यानंतर कार्यक्रमस्थळावरून मोठ्या प्रमाणात लोक बाहेर जाण्याचा प्रयत्न करू लागल्याने चेंगराचेंगरी झाली व जमिनीवर बसलेले चिरडले गेले. पाणी आणि चिखलाने भरलेल्या शेतात धावणाऱ्या जमावाला बळजबरीने रोखण्याचा प्रयत्न आयोजक समितीच्या सदस्यांनी काठ्यांचा वापर करत केला. ज्यामुळे गर्दी अनियंत्रित झाली व जमिनीवर पडलेल्या महिला, मुले आणि पुरुषांना तुडवत पुढे जाऊ लागले, असे एफआयआरमध्ये म्हटले आहे.
- उपस्थित पोलिस व प्रशासकीय अधिकाऱ्यांनी सर्वतोपरी प्रयत्न करून जखमींना उपलब्ध साधनसामुग्रीसह रुग्णालयात पाठवले, मात्र आयोजकांकडून कोणतेही सहकार्य करण्यात आले नाही.
- एफआयआरमध्ये पुढे म्हटले आहे की, मंगळवारी दुपारी दोनच्या सुमारास भोळे बाबांचा ताफा कार्यक्रमस्थळाबाहेर गेला.
