Ram Rahim acquits : डेरा सच्चा सौदाचा प्रमुख गुरमीत राम रहीमची खून प्रकरणातून निर्दोष मुक्तता

याप्रकरणी आज पंजाब आणि हरियाणा हायकोर्टात सुनावणी झाली. सुनावणीदरम्यान उच्च न्यायालयाने डेरा सच्चा सौदाचा प्रमुख गुरमीत राम रहीम सिंहसह इतर चौघांना रणजित सिंह हत्येप्रकरणी निर्दोष मुक्त केले असल्याची माहिती राम रहीमच्या वकिलांनी पत्रकारांना दिली. डेरा सच्चा सौदाचा प्रमुख गुरमीत राम रहिम यांच्याव्यतिरिक्त अवतार सिंह, जसबीर सिंग, सबदिल सिंग आणि कृष्ण लाल हे या प्रकरणातील अन्य आरोपी होते. या सर्व आरोपींवर भादंविच्या कलम १२० बी सह भादंवि कलम ३०२ आणि कलम ५०६ (गुन्हेगारी धमकी) आणि कलम १२० बी अंतर्गत दोषी ठरवण्यात आले होते.

हे वाचाः बलात्कार प्रकरणातील दोषी राम रहीमचा सत्संग, भाजपच्या अनेक नेत्यांची हजेरी

निनावी पत्रात काय होते गुरमीत विरोधात आरोप?

गुरमीत राम रहिमच्या डेरा सच्चा सौदाच्या आश्रमात सुरू असलेल्या बेकायदेशीर कारवायांची माहिती रणजीत सिंह यांनी एक निनावी पत्र प्रसारित करून चव्हाट्यावर आणला होता, असं बोललं जात आहे. या निनावी पत्राच्या मजकुरात राम रहीमवर गंभीर आरोप होते. आश्रमात राहणाऱ्या साध्वींचे लैंगिक शोषण होत असल्याचा आरोप पत्रातून करण्यात आला होता. याच पत्राचा वापर सिरसा येथील पत्रकार रामचंद्र छत्रपती यांनी एका वृत्तात केला होता. छत्रपती यांच्या वृत्तामुळे अनेक तपास यंत्रणांचे लक्ष वेधले गेले होते. त्यानंतर छत्रपती यांची सुद्धा त्यांची हत्या करण्यात आली होती. पत्रकार रामचंद्र छत्रपती यांच्या हत्येप्रकरणात गुरमीत राम रहीमला कोर्टाने दोषी ठरवण्यात आले असून सध्या शिक्षा भोगत आहे.

हे वाचाः लिव्हिंगस्टोनला पाहून वसीम जाफरला बाबा राम रहीमची आठवण

बलात्कार प्रकरणात राम रहिम जेलमध्ये राहणार

डेरा सच्चा सौदाचा प्रमुख गुरमीत राम रहिम याच्यावर त्याच्या दोन शिष्यांवर बलात्कार केल्याचा आरोप आहे. या प्रकरणात २० वर्षांच्या तुरुंगवासाची शिक्षा ठोठावण्यात आली असून तो हरियाणातील रोहतक येथील सुनारिया कारागृहात कैद आहे.

हे वाचाः पॅरोलवर असलेल्या बलात्कारी राम रहीमचा जंगी बर्थ-डे; तलवारीनं कापला केक