Gujarat Rain : गुजरातमध्ये पावसाचा हाहाकार! पुरामुळे ३० जणांचा मृत्यू; ११ जिल्ह्यांमध्ये आज पुन्हा रेड अलर्ट

एनडीटीव्हीच्या रिपोर्टनुसार, हवामान खात्याने 30 ऑगस्टपर्यंत गुजरातमधील विविध जिल्ह्यात अतिवृष्टीचा इशारा दिला आहे. गुरुवारी सौराष्ट्रातील जिल्ह्यांमध्ये अतिवृष्टीचा अंदाज हवामान खात्याने वर्तवला आहे. राज्य आपत्कालीन ऑपरेशन केंद्राने सांगितले की, पावसामुळे, गुजरातमध्ये आतापर्यंत वार्षिक सरासरीच्या १०५ टक्के पाऊस झाला आहे. रविवारपासून पाऊस सुरू झाला असून पावसामुळे ३० जणांचा मृत्यू झाला आहे. पुरामुळे १८,००० लोकांना सुरक्षित स्थळी हलवण्यात आले आहे.

आजवा आणि प्रतापपुरा जलाशयातील पाणी विश्वामित्री नदीत सोडण्यात आल्याने पूरस्थिती निर्माण झाली आहे. वडोदरातील काही भाग आणि नदीकाठावरील शहरात व गावांमध्ये १० ते १२ फुटांपर्यंत पाणी साचले आहे. शहरातून वाहणाऱ्या विश्वामित्री नदीचे पाणी किनारा सोडून रहिवासी भागात घुसल्याने वडोदरा येथेही पूर आला आहे. येथील इमारती, रस्ते आणि वाहने पाण्याखाली गेली आहेत.

राज्यातील १४० जलाशय आणि धरणे व २४ नद्या धोक्याची पातळी सोडून वाहत आहेत. राष्ट्रीय आणि राज्य आपत्ती निवारण दलांव्यतिरिक्त, लष्कर, हवाई दल आणि तटरक्षक दलांना बचाव आणि मदत कार्यासाठी पाचारण करण्यात आले आहे. पूरग्रस्त भागातून अद्यापही अनेकांना बाहेर काढणे बाकी आहे.

पंतप्रधान नरेंद्र मोदी यांनी मुख्यमंत्री भूपेंद्र पटेल यांच्याशी चर्चा करून सर्वतोपरी मदत करण्याचे आश्वासन दिले आहे. राज्याचे आरोग्य मंत्री रुषिकेश पटेल म्हणाले की, सरकार पुराचे पाणी विश्वामित्री नदीत सोडण्याऐवजी नर्मदा कालव्यात वळवण्याचा विचार करत आहे.

गुजरातमधील ११ जिल्ह्यांमध्ये आज अतिवृष्टीचा रेड अलर्ट

इंडिया टुडेने दिलेल्या वृत्तानुसार, गुजरातमधील ११ जिल्ह्यांमध्ये हवामान विभागाने रेड अलर्ट जारी केला आहे तर २२ जिल्ह्यांमध्ये यलो अलर्ट जारी केला आहे. हवामान विभागाने कच्छ आणि सौराष्ट्र प्रदेशांसाठी रेड अलर्ट जारी केला आहे, ज्यात कच्छ, द्वारका, जामनगर, मोरबी, सुरेंद्रनगर, जुनागढ, राजकोट, बोताड, गिरसोमनाथ, अमरेली आणि भावनगरचा समावेश आहे. त्याचप्रमाणे उत्तर गुजरात, मध्य गुजरात आणि दक्षिण गुजरातसाठी यलो अलर्ट जारी करण्यात आला आहे. अतिवृष्टीमुळे आतापर्यंत किमान ३० लोकांचा मृत्यू झाला आहे, तर २३००० हून अधिक लोकांना सुरक्षित ठिकाणी हलवण्यात आले आहे. तर ३०० हून अधिक लोकांना पुराच्या पाण्यातून वाचवण्यात आले आहे.

बचाव कार्य सुरू

राज्यात बचाव कार्य जोरात सुरू आहे, राज्यभरात पावसामुळे नद्या आणि धरणांमध्ये पाण्याची पातळी वाढल्याने ६००० हून अधिक लोकांना सुरक्षित स्थळी हलवण्यात आले आहे. हवामान खात्याने सांगितले की, हे पावसाचे प्रमाण सौराष्ट्र आणि कच्छ प्रदेशात पश्चिम आणि नैऋत्येकडे सरकेल आणि २९ ऑगस्टपर्यंत पाकिस्तान किनारपट्टीच्या आसपासच्या भागात पावसाचा जोर कायम राहणार आहे. हवामान खात्याने पुढे सांगितले की, कच्छ आणि सौराष्ट्र प्रदेशात पावसामुळे रस्त्यांवर स्थानिक पूर, सखल भागात पाणी साचण्याची आणि प्रामुख्याने शहरी भागात अंडरपास बंद होण्याची शक्यता आहे.

गुजरात सरकारने लष्कर केले तैनात

गुजरात सरकारने भारतीय लष्कराच्या सहा तुकड्या, द्वारका, आनंद, वडोदरा, खेडा, मोरबी आणि राजकोट जिल्ह्यात प्रत्येकी एक तुकडी मदतकार्यासाठी तैनात केली आहे. याव्यतिरिक्त, आपत्ती व्यवस्थापनाच्या प्रयत्नांमध्ये मदत करण्यासाठी राष्ट्रीय आपत्ती प्रतिसाद दलाच्या १४ तुकड्या आणि राज्य आपत्ती प्रतिसाद दलाच्या २२ तुकड्या आधीच तैनात करण्यात आल्या आहेत.

स्टॅच्यू ऑफ युनिटीकडे जाणारा रस्ता तुटला

बडोदा येथे मोठ्या प्रमाणात पुर आला आहे. येथे बचाव कर्मचारी पूरग्रस्त भागातील लोकांना बाहेर काढत आहेत. दरम्यान, बडोदा येथील स्टॅच्यू ऑफ युनिटीकडे जाणारा रस्ताही पावसामुळे खराब झाला आहे. हवामान खात्याने सांगितले की, ३० ऑगस्ट रोजी कमी दाबचा पट्टा कच्छ आणि सौराष्ट्र भागातून अरबी समुद्राच्या दिशेने सरकेल. तथापि, ३० ऑगस्ट रोजी ईशान्य अरबी समुद्रावर तात्पुरते आणि मध्यम तीव्रतेच्या चक्रीवादळाची शक्यता आहे.

बडोदा येथे मालवण सारखी घटना! स्टॅच्यू ऑफ युनिटीला जोडणारा रस्ता तुटला; एकेरी वाहतूक सुरु

हवामान खात्याने ३० ऑगस्ट रोजी गुजरातमधील कच्छ, द्वारका, जामनगर, मोरबी, सुरेंद्रनगर, जुनागड, राजकोट, बोताड, गिरसोमनाथ, अमरेली आणि भावनगरसह ११ जिल्ह्यांमध्ये पावसाचा यलो अलर्ट जारी केला आहे. त्याच वेळी, ३१ ऑगस्ट रोजी कच्छ, द्वारका, जामनगर, मोरबी, सुरेंद्रनगर, जुनागढ, राजकोट, बोताड, गिरसोमनाथ, अमरेली, भावनगर, सुरत, तापी, डांग्स, नवसारी, वलसाड, या भागात पावसाचा यलो अलर्ट जारी करण्यात आला आहे. दमण आणि दादरा नगर हवेली.

१ सप्टेंबर रोजी हवामान खात्याने दक्षिण गुजरातमधील नवसारी, वलसाड, दमण आणि दादरा नगर हवेलीमध्ये पावसासाठी रेड अलर्ट जारी केला आहे आणि भरूच, सुरत, तापी आणि डांग्समध्ये पिवळा अलर्ट जारी केला आहे. विभागाने केवळ नवसारी, वलसाड, दमण आणि दादरा नगर हवेलीमध्ये पावसाचा यलो अलर्ट जारी केला आहे.