नमाज पठणासाठी भररस्त्यात थांबवली सरकारी बस, VIDEO व्हायरल; चालकाविरोधात चौकशीचे आदेश

काय आहे संपूर्ण प्रकरण?

ही घटना २९ एप्रिल रोजी घडली होती. कर्नाटक राज्य मार्ग परिवहन महामंडळाची (केएसआरटीसी) बस हब्बळीहून हावेरीकडे जात होती. व्हायरल व्हिडिओमध्ये ड्रायव्हर बसमधील सीटवर बसून नमाज पठण करताना दिसत आहे. व्हिडिओमध्ये दिसत आहे की, ड्रायव्हर पूर्णपणे नमाजमध्ये मग्न आहे, तर काही प्रवासी त्याला पाहत आहेत. बाहेरील रस्त्यावरील वाहतूक सुरळीत सुरू होती. हुबळी-हावेरी रस्त्यावर झवेरीजवळ ही घटना घडली. ए. के. मुल्ला असे वाहनचालकाचे नाव आहे.

प्रवाशांच्या प्रतिक्रिया -

बसमधील काही प्रवाशांनी ही घटना आपल्या मोबाईलमध्ये रेकॉर्ड करून सोशल मीडियावर शेअर केली. मुल्ला यांचा नमाज अदा करतानाचा व्हिडिओ सध्या व्हायरल झाला आहे. प्रवास ाला उशीर झाल्याने बस मध्येच थांबविण्यात आल्याने प्रवाशांची गैरसोय झाल्याचे प्रवाशांनी सांगितले. काही प्रवाशांनी परिवहन महामंडळाच्या अधिकाऱ्यांकडे तक्रार केली.

परिवहन मंत्र्याची प्रतिक्रिया -

कर्नाटकचे परिवहन मंत्री रामलिंगा रेड्डी यांनी या घटनेची दखल घेत ईशान्य कर्नाटक रस्ते परिवहन महामंडळाच्या (एनडब्ल्यूकेआरटीसी) व्यवस्थापकांना पत्र लिहून चौकशीचे आदेश दिले आहेत. आपल्या पत्रात त्यांनी म्हटले आहे की, 'लोकसेवेत काम करणाऱ्या कर्मचाऱ्यांना काही नियमांचे पालन करावे लागते. प्रत्येक व्यक्तीला आपल्या धार्मिक प्रथांचे पालन करण्याचा अधिकार आहे, परंतु कर्तव्याच्या वेळी ते करू नये. प्रवाशांसह रस्त्याच्या मधोमध बस थांबवून नमाज पठण करणे आक्षेपार्ह आहे.

उत्तर-पश्चिम कर्नाटक रस्ते परिवहन महामंडळाच्या (एनडब्ल्यूकेआरटीसी) एका वरिष्ठ अधिकाऱ्याने दिलेल्या माहितीनुसार, दोन दिवसांपूर्वी ५८ वर्षीय व्यक्ती ड्युटीवर असताना नमाज पठण करताना दिसली होती.

एनडब्ल्यूकेआरटीसीच्या एका वरिष्ठ अधिकाऱ्याने या वृत्ताला दुजोरा दिला की ड्रायव्हर विरोधात विभागीय चौकशी सुरू करण्यात आली आहे. अधिकाऱ्यांचे म्हणणे आहे की ते व्हिडिओची सत्यता आणि घटनेच्या सर्व पैलूंची तपासणी करतील. प्रवाशांच्या तक्रारींच्या आधारे योग्य ती कारवाई केली जाईल. ही घटना व्हायरल झाल्यानंतर सोशल मीडियावर या मुद्द्यावरून जोरदार चर्चा सुरू झाली आहे. काही लोकांनी चालकाची ही कारवाई अन्यायकारक असल्याचे सांगत कडक कारवाईची मागणी केली आहे.