Manmohan Singh: मनमोहन सिंग यांनी घेतलेले ५ मोठे निर्णय, ज्यासाठी संपूर्ण देश त्यांचा सदैव ऋणी राहील!

मनमोहन सिंह हे त्यांच्या आर्थिक सुधारणावादी विचार आणि कल्याणकारी धोरणांसाठी ओळखले जातात. त्यांच्या नेतृत्वाखाली देशाने अनेक कायदे आणि योजना आमलात आणली, ज्यामुळे लाखो नागरिकांचे जीवन सुधारले. त्यांच्या कार्यकाळात झालेल्या काही ऐतिहासिक बदलांबद्दल जाणून घेऊयात.

मनमोहन सिंह यांनी घेतलेले मोठे निर्णय

• माहितीचा अधिकार (२००५)

या कायद्याने प्रत्येक भारतीय नागरिकाला सरकारी माहिती मिळवण्याचा अधिकार दिला, ज्यामुळे पारदर्शकता आणि उत्तरदायित्व सुनिश्चित झाले.

• वन हक्क कायदा (२००६)

आदिवासी समाजाला त्यांचे परंपरागत जमिनीचे हक्क परत मिळवून देण्यासाठी हे एक ऐतिहासिक पाऊल होते.

• मनरेगा (२००६)

मनमोहन सिंह यांच्या सरकारने महात्मा गांधी राष्ट्रीय ग्रामीण रोजगार हमी कायदा लागू केला, ज्याने प्रत्येक ग्रामीण कुटुंबाला एका वर्षात १०० दिवसांच्या रोजगाराचा अधिकार दिला.

• शिक्षण हक्क कायदा (२००९)

सिंग यांच्या सरकारने ६ ते १४ वयोगटातील प्रत्येक मुलाला मोफत आणि सक्तीच्या शिक्षणाचा अधिकार दिला. हा कायदा मुलांना त्यांचे मूलभूत हक्क मिळवून देण्याच्या दिशेने मैलाचा दगड ठरला.

• राष्ट्रीय अन्न सुरक्षा कायदा (२०१३)

या कायद्याद्वारे देशातील दोन तृतीयांश कुटुंबांना परवडणाऱ्या दरात खाद्यपदार्थ उपलब्ध करून देण्यात आले. दारिद्र्यरेषेखालील कुटुंबांसाठी हे पाऊल वरदान ठरले.

• भूसंपादन कायदा (२०१३)

विकास प्रकल्पांसाठी भूसंपादन करताना बाधित लोकांना योग्य मोबदला देण्यात यावा, यासाठी हा कायदा तयार करण्यात आला.

पंतप्रधान नरेंद्र मोदी शोकाकूळ

मनमोहन सिंह यांच्या निधनाबद्दल पंतप्रधान नरेंद्र मोदी यांनी दु:ख व्यक्त केले आहे. एक्स वरील पोस्टमध्ये नरेंद्र मोदी म्हणाले की, 'मनमोहन सिंह पंतप्रधान होते आणि मी गुजरातचा मुख्यमंत्री होतो, तेव्हा मी आणि मनमोहन सिंह नियमित पणे संवाद साधत होतो. प्रशासनाशी संबंधित विविध विषयांवर आम्ही व्यापक चर्चा करायचो. त्यांचे शहाणपण आणि नम्रता नेहमीच दिसून येत असे. या दु:खाच्या क्षणी माझ्या संवेदना डॉ. मनमोहन सिंग यांचे कुटुंबीय, त्यांचे मित्र आणि असंख्य चाहत्यांसोबत आहेत.'