K. Kasturirangan : इस्रोचे माजी अध्यक्ष के. कस्तुरीरंगन यांचे निधन; राष्ट्रीय शिक्षण धोरण तयार करण्यात होते योगदान

आज सकाळी बंगळुरू येथील राहत्या घरी त्यांचे निधन झाले. त्यांचे पार्थिव २७ एप्रिल रोजी रमण रिसर्च इन्स्टिट्यूट (आरआरआय) येथे अंत्यदर्शनासाठी ठेवण्यात येणार आहे. महत्त्वाकांक्षी नवीन राष्ट्रीय शिक्षण धोरणाचा (एनईपी) मसुदा तयार करणाऱ्या मसुदा समितीचे माजी इस्रो प्रमुख अध्यक्ष होते. एनईपीमध्ये सूचीबद्ध शैक्षणिक सुधारणांचे प्रणेते म्हणून ओळखले जाणारे कस्तुरीरंगन जवाहरलाल नेहरू विद्यापीठाचे कुलपती आणि कर्नाटक ज्ञान आयोगाचे अध्यक्ष म्हणूनही कार्यरत होते.

राज्यसभा सदस्यही राहिले आहेत -

कस्तुरीरंगन हे संसदेचे वरिष्ठ सभागृह राज्यसभेचे ही सदस्य होते. २००३ ते २००९ या काळात ते या सभागृहाचे सदस्य होते. तत्कालीन नियोजन आयोगाचे सदस्य म्हणूनही त्यांनी काम पाहिले. कस्तुरीरंगन एप्रिल २००४ ते २००९ या काळात बंगळुरूच्या नॅशनल इन्स्टिट्यूट ऑफ अॅडव्हान्स्ड स्टडीजचे संचालक होते.

पद्म विभूषण पुरस्काराने सन्मानित -

इस्रोच्या माजी प्रमुखांचा जन्म २४ ऑक्टोबर १९४० रोजी केरळमधील एर्नाकुलम येथे सीएम कृष्णस्वामी अय्यर आणि विशालाक्षी यांच्या पोटी झाला. मूळचे तामिळनाडूचे असलेले त्यांचे कुटुंब त्रिशूर जिल्ह्यातील चालाकुडी येथे स्थायिक झाले होते. त्यांची आई पलक्कड अय्यर कुटुंबातील होती. ऑगस्ट २००३ मध्ये निवृत्त होण्यापूर्वी त्यांनी नऊ वर्षे इस्रोचे अध्यक्ष म्हणून काम पाहिले. त्यांच्या अनुकरणीय कार्याबद्दल त्यांना २००० साली पद्मविभूषण पुरस्काराने सन्मानित करण्यात आले होते.