DRDO ची कमाल.. समुद्राचे खारट पाणी गोडे बनवण्याचे तंत्रज्ञान ८ महिन्यात केले विकसित
डीआरडीओने मेक इन इंडिया आणि आत्मनिर्भर भारताच्या दिशेने महत्त्वपूर्ण मैलाचा दगड गाठला आहे. अवघ्या आठ महिन्यांत असे देशी तंत्र तयार करण्यात आले आहे, जे समुद्रातील खारे पाणी गोड करू शकते.
'मेक इन इंडिया' आणि 'आत्मनिर्भर भारत' या दिशेने मोठे यश मिळवत डीआरडीओने अशी कामगिरी केली आहे जी देशाच्या किनारपट्टी भाग आणि संरक्षण क्षेत्र या दोन्हींसाठी अत्यंत महत्त्वाची ठरू शकते. डीआरडीओच्या कानपूर येथील प्रयोगशाळेने केवळ ८ महिन्यांत नॅनोपोरस मल्टीलेयर्ड पॉलिमर मेम्ब्रेन तंत्रज्ञान विकसित केले आहे, जे समुद्राच्या क्षारयुक्त पाण्याचे पिण्यायोग्य गोड्या पाण्यात रूपांतर करू शकते. भारतीय तटरक्षक दलाच्या जहाजांसाठी हे तंत्रज्ञान खास डिझाइन करण्यात आले आहे.
तटरक्षक दलाच्या जहाजांवर यशस्वी चाचणी -
भारतीय तटरक्षक दलाच्या (आयसीजी) ऑफशोर पेट्रोलिंग व्हेसलवर (ओपीव्ही) या स्वदेशी तंत्रज्ञानाची चाचणी घेण्यात आली आहे. सुरुवातीच्या सुरक्षा आणि कामगिरी चाचणीत ते पूर्णपणे यशस्वी झाले आहे. आता ५०० तासांच्या ऑपरेशनल टेस्टिंगनंतर त्याला अंतिम मंजुरी देण्यात येणार आहे.
जल संकट दूर करण्यात ठरणार महत्वपूर्ण -
खरं तर, समुद्राच्या पाण्यात असलेले क्लोराईड आयन सामान्य पडद्याचे नुकसान करतात, परंतु डीआरडीओचे हे नवीन तंत्रज्ञान या प्रभावापासून पूर्णपणे सुरक्षित आहे. हे तंत्रज्ञान केवळ भारतीय तटरक्षक दलासाठीच उपयुक्त नाही, तर भारतातील ज्या भागात पाण्याची प्रचंड कमतरता आहे, त्या भागांसाठी भविष्यात जल जीवन मिशनसारखे वरदान ठरू शकते.
आत्मनिर्भरतेच्या दिशेने मजबूत पावले-
तेजस लढाऊ विमाने, अग्नि-पृथ्वी क्षेपणास्त्र, पिनाका रॉकेट प्रणाली आणि आकाश हवाई संरक्षण यासारख्या स्वदेशी संरक्षण प्रणालींच्या निर्मितीत डीआरडीओ यापूर्वीच अग्रेसर आहे. आता या नव्या तंत्रज्ञानामुळे भारताला जलसुरक्षेत आत्मनिर्भर बनवण्याच्या दिशेने नवा आयाम जोडला जाणार आहे.
संबंधित बातम्या