दीड लाखाची ओला स्कूटर दोन दिवसांत खराब झाली! सर्व्हिसही मिळत नव्हती, भडकलेल्या ग्राहकानं शोरूमच जाळून टाकला

नवीन इलेक्ट्रिक स्कूटरमध्ये बिघाडानंतर योग्य सेवा मिळत नसल्यामुळं कर्नाटकातील कलबुर्गी इथं एका व्यक्तीनं ओलाच्या शोरूमला आग लावली. या घटनेचा व्हिडिओ सध्या सोशल मीडियावर व्हायरल झाला आहे. मोहम्मद नदीम असं या व्यक्तीचं नाव आहे. नदीमला पोलिसांनी ताब्यात घेतलं आहे.

नदीमनं महिन्याभरापूर्वी १.४० लाख रुपयांची इलेक्ट्रिक स्कूटर खरेदी केली होती, पण एक-दोन दिवसांनी त्यात अडचणी येऊ लागल्या. तो अनेक वेळा शोरूममध्ये गेला, पण त्याचा प्रश्न सुटला नाही. त्यामुळं तो संतापला आणि रागाच्या भरात शोरूमला आग लावली. ही आग शॉर्ट सर्किटमुळं आग लागली असावी असा प्राथमिक अंदाज होता. मात्र, हा अपघात नसून नदीमचं कृत्य असल्याचं समोर आलं. त्यानंतर त्याच्याविरोधात तक्रार दाखल करण्यात आली. तसंच, त्याला चौकशीसाठी ताब्यात घेण्यात आलं आहे.

पेट्रोल ओतून शोरूम जाळले!

ही घटना मंगळवार, १० सप्टेंबर रोजी घडली. मोहम्मद नदीम त्याच्या नवीन इलेक्ट्रिक स्कूटरमधील बिघाडामुळं वैतागला होता. शोरूमच्या कर्मचाऱ्यांकडं अनेकदा तक्रार करूनही मदत मिळाली नाही. शोरूममधील ग्राहक सेवा अधिकाऱ्यांशी त्याची बाचाबाची झाली. त्यानंतर त्यानं पेट्रोल टाकून शोरूमला आग लावली. या आगीत ६ वाहनं आणि संगणक प्रणाली जळून खाक झाली. नदीम हा व्यवसायानं मेकॅनिक आहे. त्यानं खरेदी केलेल्या स्कूटरमध्ये अवघ्या २ दिवसांत बॅटरी आणि साउंड सिस्टममध्ये तांत्रिक समस्या येऊ लागल्या.

हेही वाचा: एअरटेल, जिओचा फेस्टिव्ह प्रीपेड प्लान लॉन्च; कुठं मिळतोय जास्त फायदा? वाचा

सुमारे साडेआठ लाख रुपयांचं नुकसान

आगीत संपूर्ण शोरूम जळून खाक झाला आहे. आगीमुळं दुकानातून धुराचे लोट उसळत होते. या घटनेत कंपनीचं अंदाजे साडेआठ लाख रुपयांचं नुकसान झालं आहे. पोलिसांनी गुन्हा दाखल करून आरोपीला अटक केली आहे. सुदैवानं आग लावली गेली तेव्हा शोरूम बंद असल्यानं या घटनेत कोणतीही जीवितहानी झाली नाही.