केजरीवालांनी बांधलेल्या 'शीशमहल' मध्ये भाजपचा मुख्यमंत्री राहणार का?; भाजप नेत्यांचा मोठा खुलासा
SheeshMahal :२७ वर्षांनंतर दिल्लीत भाजपचे सरकार आले आहे. अशा स्थितीत दिल्लीचे मुख्यमंत्रीही या 'शीशमहल'मध्ये राहणार का, असा प्रश्न सर्वांच्या मनात आहे. याला भाजप नेत्यांनी उत्तर दिले आहे.
Sheesh Mahal Arvind kejriwal : दिल्ली विधानसभेच्या निवडणूक प्रचारादरम्यान भाजपने शीशमहलचा मुद्दा उपस्थित करत अरविंद केजरीवाल यांना चांगलेच घेरले होते. हा मुद्दा प्रचाराचा केंद्रबिंदू राहिला आहे. अरविंद केजरीवाल मुख्यमंत्री असताना दिल्लीच्या मुख्यमंत्र्यांच्या निवासस्थानाच्या नूतनीकरणावर कोरोना काळात कोट्यवधी रुपये खर्च केल्याचा आरोप भाजपकडून करण्यात आला होता. भाजपने मुख्यमंत्र्यांच्या निवासस्थानाला 'शीशमहल' असे नाव दिले. आता २७ वर्षांनंतर दिल्लीत भाजपचे सरकार आले आहे. अशा स्थितीत दिल्लीचे मुख्यमंत्रीही या 'शीशमहल'मध्ये राहणार का, असा प्रश्न सर्वांच्या मनात आहे.
दिल्ली भाजपचे अध्यक्ष वीरेंद्र सचदेवा म्हणाले की, भाजपचा मुख्यमंत्री शीशमहलमध्ये राहणार नाही. नवी दिल्ली विधानसभा मतदारसंघातून अरविंद केजरीवालांचा पराभव करणारे भाजप नेते प्रवेश वर्मा यांनीही शीश महलमध्ये कोणीही राहू नये, असे म्हटले आहे. मुख्यमंत्र्यांसाठी एवढ्या मोठ्या निवासस्थानाची गरज नाही. मी पक्षाला सांगेन की, जो कोणी मुख्यमंत्री होईल, त्याने शीशमहलमध्ये राहू नये. त्या शीशमहलचे पर्यटन स्थळ, गेस्ट हाऊस किंवा आणखी काही बनवावे, असे ते म्हणाले.
मुस्लिमांच्या प्रश्नावर प्रवेश वर्मा म्हणाले की, मला कोणी मतदान केले नाही असे मी म्हणणार नाही. आमचे सरकार सर्वांसाठी काम करेल आणि कोणाकडेही दुर्लक्ष केले जाणार नाही. माझा सल्ला असा आहे की, नव्या मुख्यमंत्र्यांनी शीशमहालमध्ये राहू नये. अशा घरात दुबईचा शेखच राहू शकतो. कोणताही लोकसेवक असे जगू शकत नाही. ते म्हणाले की, ते केवळ गेस्ट हाऊस किंवा म्युझियम बनवू शकते. शीश महल हा देखील दिल्ली निवडणुकीत मोठा मुद्दा बनला होता. अरविंद केजरीवाल यांना या बंगल्याने सतत घेरले होते आणि जनतेच्या कष्टाच्या पैशातून आलिशान घरे बांधल्याचा आरोप होत होता. अशा तऱ्हेने त्यांच्या पराभवाच्या अनेक मुद्द्यांपैकी हाही एक मुद्दा मानला जात आहे.
काय आहे शीश महाल?
शीलमहाल दिल्ली निवडणुकीच्या केंद्रस्थानी होता. दिल्लीतील मुख्यमंत्र्यांचे निवासस्थान म्हणजेच 'शीश महल' हे ६ प्लागस्टाफ रोड, सिव्हिल लाईन्स येथे आहे. कॅगच्या अहवालानुसार केजरीवाल यांनी या बंगल्याच्या नूतनीकरणासाठी एकूण ३३ कोटी रुपये खर्च केले होते. २०२३ मध्ये शीशमहालचे पडदे, कार्पेट आणि बाथरुमच्या नळांची किंमत सांगून भाजपने आप व केजरीवालांवर निशाणा साधला होता. संपूर्ण देश कोरोनाच्या झळा सोसत असताना केजरीवाल शीशमहाल बांधण्यात व्यस्त होते असा आरोप भाजपने केला होता.
Shrikant Ashok Londhe
संबंधित बातम्या