'कमकुवत पंतप्रधान' अशी टीका झालेले मनमोहन सिंग करणार होते पाकिस्तानवर हल्ला, पण…
Manmohan Singh : मनमोहन सिंग हे संतप्रतिमेचे, शांत व संयमी नेते म्हणून ओळखले जात होते. मात्र, ते पंतप्रधान असतांना पण एक प्रसंग असा ही आला की, त्यांनी पाकिस्तानवर लष्करी कारवाई करण्याचा निर्णय घेतला होता.
Manmohan Singh : माजी पंतप्रधान मनमोहन सिंग यांचे गुरुवारी रात्री दिल्लीतील एम्स रुग्णालयात निधन झाले. त्यांच्या निधनाने देशभरातील अनेक दिग्गज नेत्यांनी शोक व्यक्त केला आहे. ते देशाचे पहिले शीख पंतप्रधान होते. मनमोहन सिंग हे संतप्रतिमेचे नेते म्हणून ओळखले जात होते. ते शांत व संयमी असे नेते होते. त्यामुळे त्यांच्यावर अनेकदा कमकुवत, काँग्रेस अध्यक्षांच्या इशाऱ्यावर चालणारा नेता अशी टीका विरोधकांनी सातत्याने मनमोहनसिंग यांच्यावर केली. पण एक प्रसंग असा ही आला की, मनमोहन सिंग यांनी पाकिस्तानवर हल्ला करण्याचा निर्णय घेतला होता.
ब्रिटनचे माजी पंतप्रधान डेव्हिड कॅमेरून यांनी त्यांच्या पुस्तकात या बाबतचा खुलासा केला आहे. मनमोहन सिंग हे पाकिस्तानवर लष्करी कारवाईच्या तयारीत होते. कॅमेरून हे २०१० ते २०१६ या काळात ब्रिटनचे पंतप्रधान होते. मनमोहन सिंग यांना ते आपले मित्र म्हणतात. आपल्या पुस्तकात त्यांनी सिंग यांचे वर्णन संत म्हणून केले होते. मनमोहनसिंह शांत स्वभावाचे असले, तरी देशाच्या अस्मितेप्रति त्यांची भूमिका कणखर होती. मुंबईवरील २६/११ सारखा दहशतवादी हल्ला पुन्हा झाला असता, तर मनमोहनसिंग पाकिस्तानविरोधात लष्करी कारवाई करण्याच्या तयारीत होते, असा गौप्यस्फोट कॅमेरॉन यांनी त्यांच्या पुस्तकात केला आहे. त्यांच्या 'फॉर द रेकॉर्ड' या पुस्तकात त्यांनी या बाबत लिहिलं आहे. या पुस्तकात २०१० ते २०१६ कालावधीतील तत्कालीन पंतप्रधान मनमोहनसिंग आणि नरेंद्र मोदी यांच्यासोबतच्या भेटीगाठींना त्यांनी विशेष स्थान दिले आहे. 'मनमोहनसिंग यांच्यासोबत माझे अतिशय मैत्रिपूर्ण संबंध होते. सन २००८च्या मुंबई हल्ल्यानंतर जुलै २०११मध्ये त्यांची पुन्हा भेट झाली. तेव्हा जर अशाप्रकारचा हल्ला पुन्हा झाला, तर भारत पाकिस्तानविरोधात लष्करी कारवाई करेल, असे मनमोहन आपल्याला म्हणाले होते,' असे पुस्तकात म्हटले आहे.
कॅमेरॉन यांनी या पुस्तकात भारताविषयीचे अनेक मुद्दे नमूद केले आहेत. ब्रिटनच्या जडणघडणीत असलेले भारतीय वंशाच्या नागरिकांचे योगदान, नोव्हेंबर २०१५मधील विम्ब्ली स्टेडिअमवरील मोदींची गळाभेट, राजधानी दिल्लीतील टुकटुकमधील प्रवास ते मुंबईतल्या झोपडपट्टीतील सफर यांसह अमृतसरमधील सुवर्ण मंदिराला दिलेली भेट व जालियनवाला बाग हत्याकांडाबाबतची दिलगिरी यांचा त्यांनी यात आवर्जून उल्लेख केला आहे.
मनमोहन सिंग यांनी एकदा प्री-मेडिकल कोर्सला प्रवेश घेतला होता, कारण त्यांच्या वडिलांची इच्छा होती की त्यांनी डॉक्टर व्हावे. परंतु काही महिन्यांनंतर त्यांचा या विषयातील रस गेला. त्यांनी वैद्यकीय शिक्षण सोडले. माजी पंतप्रधानांची कन्या दमन सिंह यांनी त्यांच्यावरील पुस्तकात याचा उल्लेख केला आहे.
माजी पंतप्रधान मनमोहन सिंग यांना आदरांजली वाहण्यासाठी काँग्रेसने आपले सर्व शासकीय कार्यक्रम सात दिवसांसाठी रद्द केले आहेत. काँग्रेसचे सरचिटणीस (संघटन) केसी वेणुगोपाल यांनी सोशल मीडिया प्लॅटफॉर्म 'एक्स'वर पोस्ट केले की, दिवंगत माजी पंतप्रधान डॉ. मनमोहन सिंग यांना आदरांजली वाहण्यासाठी काँग्रेस पक्षाचे सर्व अधिकृत कार्यक्रम पुढील सात दिवसांसाठी रद्द करण्यात आले आहेत.
संबंधित बातम्या