Viral Video: वायर चोरल्याचा आरोपाखाली १२ मुलासोबत तरुणांचं लाजीरवाणे कृत्य, व्हिडिओ पाहून संतापले लोक!
Boy Stripped Viral Video: राजस्थानमधील कोटा येथे चोरीच्या आरोपाखाली एका १२ वर्षाच्या मुलासोबत लाजीरवाणे कृत्य करणाऱ्या सहा जणांविरोधात पोलिसांनी गुन्हा दाखल केला आहे.
Viral News: राजस्थानमधील कोटा येथे एक व्हिडिओ व्हायरल होत आहे. एका कार्यक्रमादरम्यान वायर चोरताना पकडलेल्या एका १२ वर्षीय दलित मुलाला निर्वस्त्र करून नाचण्यास भाग पाडल्याची घटना उघडकीस आली आहे. आरोपींनी या घटनेचा व्हिडिओ बनवून सोशल मीडियावर व्हायरल केला. व्हायरल व्हिडिओमध्ये संबंधित मुलाला नाचायला भाग पाडले जात असल्याचे दिसत आहे. या व्हिडिओवर नेटकऱ्यांच्या संतापजनक प्रतिक्रिया येत आहेत.
व्हिडिओ व्हायरल झाल्यानंतर पोलिसांनी सांगितले की, व्हिडिओ सापडल्यानंतर आणि पीडितेचा शोध घेतल्यानंतर हा प्रकार उघडकीस आला. पोलिसांनी पीडितेच्या कुटुंबीयांना तक्रार दाखल करण्यास प्रोत्साहित केले. पीडित मुलीच्या वडिलांनी दिलेल्या तक्रारीनुसार, शुक्रवारी रात्री त्यांचा मुलगा जीएडी सर्कल येथे आयोजित जत्रेत विनोदी कार्यक्रमात सहभागी होण्यासाठी गेला होता आणि रात्री एक ते पहाटे चार वाजताच्या दरम्यान चार ते पाच जणांनी त्यांच्या मुलाला घेरले आणि वायर चोरल्याचा आरोप करत मारहाण केली. एवढेच नव्हेतर आरोपींनी आपल्या मुलाला नग्न होऊन नाचायला भाग पाडले आणि त्याचा व्हिडिओ बनवला, असा आरोपही फिर्यादीने केला आहे.
पीडित मुलाच्या वडिलांची पोलिसांत धाव
वडिलांच्या तक्रारीवरून भारतीय दंड संहिता, अनुसूचित जाती-जमाती कायदा आणि पोक्सो कायद्याच्या संबंधित कलमान्वये गुन्हा दाखल करण्यात आला आहे. या प्रकरणी आरोपी बाप-लेकासह सहा जणांना पोलिसांनी अटक केली आहे. क्षितिज गुर्जर (वय, २४) उर्फ बिट्टू, आशिष उपाध्याय उर्फ विक्कू (वय, ५२), त्यांचा मुलगा ययाती उपाध्याय (वय, २४) ऊर्फ गुनगुन, गौरव सोनी (वय, २१), संदीप सिंह (वय, ३०) ऊर्फ राहुल बन्नाशा आणि सुमितकुमार सैन (वय, २५) अशी आरोपींची नावे आहेत.
आरोपींविरोधात गुन्हा दाखल
डीएसपी मनीष शर्मा यांनी सांगितले की, प्राथमिक तपासादरम्यान पोलिसांना असे आढळले की, सहा आरोपी एका म्युझिक कंपनीचा भाग होते आणि पीडितेने त्यांच्या म्युझिक सिस्टममधील वायर चोरल्याचा संशय आहे. शर्मा यांनी सांगितले की, आरोपींना न्यायालयात हजर करण्यात आले.
याआधी सोशल मीडियावर एका महिलेला काही लोकांनी मारहाण केल्याचा व्हिडिओ व्हायरल झाला होता, काही लोक एका वृद्ध महिलेला काठीने मारहाण करताना दिसत आहेत.काही महिला हातात काठ्या घेऊनही दिसत आहेत. एक तरुणी महिलेला काठीने मारहाण करताना दिसत आहे. पीडित महिला जमीनीवर पडलेली दिसत आहे. मारहाणीनंतर काही लोक महिलेला उचलून रस्त्यावर फेकतात. हा व्हिडिओ नेमका कधीचा आणि कुठला आहे, याबाबत अद्याप कोणतीही अधिकृत माहिती समजू शकलेली नाही.
