टायर फुटल्याने भरधाव कार ट्रकवर आदळली; सासू-सुनेचा मृत्यू, अपघाताचा थरारक CCTV समोर

या अपघातात एकाच कुटूंबातील दोन महिलांचा मृत्यू झाला तर अन्य चार जण गंभीर जखमी झाले आहेत. अपघातात मृत्युमुखी पडलेल्या दोन महिला या सासू आणि सून असल्याचे म्हटले होते. हा अपघात रविवारी पूर्वांचल महामार्गावर माईलस्टोन ८९ जवळ झाला. अपघातग्रस्त कुटुंब काशी विश्वनाथाचं दर्शन घेण्यासाठी आणि लग्न समारंभात सहभागी होण्यासाठी वाराणसीला जात होते. परंतु रस्त्यातच टायर फुटल्याने भीषण अपघात झाला. व्हिडिओमध्ये दिसते की, एक्सप्रेस वेवर भरधाव कार ट्रकला पाठीमागून धडक देऊन रस्त्याकडेला पलटी झाली.

कारचा टायर फुटल्याने हा अपघात झाल्याचे बोलले जात आहे. टायर फुटल्याने कार अनियंत्रित होऊन समोरून जाणाऱ्या ट्रकवर आदळली. ही धडक इतकी भीषण होती की, ट्रकला धडकल्यानंतर कार महामार्गावर दोन ते तीन वेळा पलटी झाली व त्यानंतर दुभाजकावर आदळली. या अपघातात एक बालक सुखरूप बचावल्याची माहिती मिळत आहे.

घटनेची माहिती मिळताच पोलीस घटनास्थळी दाखल झाले. त्यांनी जखमींना रुग्णालयात नेण्याची व्यवस्था केली. अपघाताची चौकशी सुरू केली आहे.