शेरास सव्वाशेर..! खोट्या केसेसमध्ये अडकवण्याचा धाक दाखवून एकाने २० पोलिसांकडून उकळली खंडणी
Bengaluru News : पोलिसांचा खबऱ्या असलेल्या आरोपीने खासकरून क्राईम युनिटमधील कनिष्ट दर्जाच्या पोलिसांचे जाळे तयार केले होते, जे त्याला माहिती पुरवत असत. त्याच्या आधारे त्याने २० पोलिसांना ब्लॅकमेल करून त्यांच्याकडून खंडणी उकळली.
मानवी हक्क उल्लंघनाच्या प्रकरणात अडकवण्याची धमकी देऊन २० हून अधिक पोलिस अधिकाऱ्यांकडून पैसे उकळण्याचा प्रकार समोर आला आहे. सय्यद सरफराज अहमद (वय ३५) असे आरोपीचे नाव असून त्याला बेंगळुरू पोलिसांनी मंगळवारी अटक केली. बेंगळुरूमधील शहरातील भारती नगर येथील रहिवासी असलेल्या अहमदने यापूर्वी शिवाजीनगर, डीजे हळ्ळी आणि आरटी नगर येथील पोलिस ठाण्यांमध्ये खबऱ्या म्हणून काम केले असून पोलिस दलात मोठे जाळे निर्माण केले आहे.
एका रेस्टॉरंटमध्ये गोंधळ घालणाऱ्या इरशाद नावाच्या व्यक्तीला शिवाजीनगर पोलिसांनी २४ जुलै रोजी ताब्यात घेऊन त्याच्यावर आर्म्स अॅक्टनुसार गुन्हा दाखल केला होता. त्याच्या अटकेनंतर कर्नाटक राज्य मानवी हक्क आयोगाच्या (केएचआरसी) उपअधीक्षकांनी स्टेशनला भेट देऊन बेकायदा अटकेच्या तक्रारीची चौकशी केली. कागदपत्रांचा आढावा घेतल्यानंतर अधिकाऱ्याने इर्शादची अटक कायदेशीर असल्याची पुष्टी केली.
केएसएचआरसीच्या अधिकाऱ्याने हेन्नूर, आरटी नगर आणि राममूर्ती नगरसह इतर पोलीस ठाण्यांना अशाच प्रकारे भेट दिली. अधिक तपासात अहमदचा या घटनेमागे हात असल्याचे निष्पन्न झाले असून त्याने इरशादविरोधात तक्रार मागे घेण्यासाठी ५० हजार रुपयांची मागणी केली होती.
अहमदला पकडण्यासाठी पोलिसांनी त्याची मागणी मान्य करण्याचे नाटक केले. पैसे देण्याकरिता त्याच्याकडे आल्यानंतर त्याला अटक करण्यात आली. अहमदने पूर्व, ईशान्य आणि व्हाईटफिल्ड विभागातील अनेक पोलिस ठाण्यांमध्ये अशाप्रकारचे गुन्हे केल्याचे चौकशीत समोर आले आहे.
एका पोलिस अधिकाऱ्याने वृत्तपत्राशी बोलताना स्पष्ट केले की, अहमद, जो एक पोलिसांचा खबऱ्या होता, त्याने खालच्या दर्जाच्या पोलिस कर्मचाऱ्यांचे जाळे तयार केले होते. विशेषत: गुन्हे युनिटमध्ये, जे त्याला माहिती पुरवतात. बंदिवानांची तपासणी करण्यासाठी ते वारंवार पोलिस ठाण्यांना भेट देत असत आणि या माहितीचा उपयोग केएसएचआरसीकडे गुन्हे दाखल करण्यासाठी करीत असत. त्यानंतर त्यांनी तक्रारी मागे घेण्यासाठी निरीक्षकांकडे पैशांची मागणी केली.
अहमद यांच्यावर भारतीय न्याय संहितेच्या (बीएनएस) कलम ३०८ (२) (खंडणी) आणि १३२ (सरकारी कर्मचाऱ्यावर हल्ला करणे किंवा कर्तव्य बजावताना फौजदारी बळाचा वापर करणे) अंतर्गत आरोप ठेवण्यात आले आहेत. पुढील तपास सुरू आहे.