बँक कर्मचाऱ्यानेच एका कंपनीच्या खात्यातून उडवले १२ कोटी रुपये, बदलला होता रजिस्टर्ड मोबाईल नंबर
सायबर फसवणुकीचा एक विचित्र प्रकार समोर आला आहे. येथे एका बँक कर्मचाऱ्याने एका कंपनीच्या खात्याचा मोबाईल नंबर आणि ईमेल आयडी बदलला. त्यानंतर १२ कोटी रुपये हडपले .
सध्या सायबर फसवणुकीचे प्रकार वाढल्याचे दिसत आहे. एखाद्यासोबत सायबर फ्रॉड झाल्यास तो बँकेची मदत घेतो, मात्र जर बँकेतूनच फसवणूक झाली असेल तर.. असाच प्रकार समोर आला आहे. बँक कर्मचाऱ्याने एका कंपनीची फसवणूक केल्याचा प्रकार समोर आला आहे. आर्थिक फसवणूक आणि सायबर फसवणुकीच्या आरोपाखाली कर्नाटक पोलिसांनी अॅक्सिस बँकेच्या रिलेशनशिप मॅनेजरसह तिघांना अटक केली आहे. बेंगळुरू येथील ड्रीमप्लग पेटेक सोल्युशन्स प्रायव्हेट लिमिटेड या कंपनीकडून रिलेशनशिप मॅनेजरने १२ कोटी रुपयांची फसवणूक केल्याचा आरोप आहे.
रिलेशनशिप मॅनेजर वैभव पिठाडिया (वय २९), बँकिंग एजंट नेहा बेन विपलभाई, इन्शुरन्स एजंट आणि वैभवचा भागीदार शैलेश अशी आरोपींची नावे आहेत. याशिवाय यात कमिशन एजंट शुभमचाही समावेश आहे. ड्रीमप्लगचे कार्यकारी नरसिंह वसंता शास्त्री यांच्या तक्रारीनंतर ही कारवाई करण्यात आली.
कंपनीच्या खात्यातून काही संशयास्पद व्यवहार होत असल्याचे लक्षात आल्यानंतर ड्रीमप्लगच्या अधिकाऱ्यांनी १२ नोव्हेंबर रोजी पोलिसांना माहिती दिली. अॅक्सिस बँकेच्या दोन खात्यांमधून १२.२ कोटी रुपये काढण्यात आल्याचे तपासात समोर आले आहे. हा व्यवहार २९ ऑक्टोबर ते ११ नोव्हेंबर दरम्यान झाला. आरोपींनी ड्रीमप्लगच्या खात्यात काही बदल करून त्याचा अॅक्सेस घेतला होता. आरोपींनी बनावट स्वाक्षरी करून, ईमेल आयडी आणि नोंदणीकृत मोबाइल क्रमांकात बदल करण्याची मागणी करून कंपनीच्या संचालक मंडळाचा प्रस्तावही तयार केला होता. त्यानंतर अॅक्सिस बँकेनेही त्याला मंजुरी दिली.
यानंतर आरोपींनी ओटीपीच्या माध्यमातून ३७ व्यवहार केले. अंकलेश्वर आणि अब्रामा बँकेच्या शाखांमध्येही हीच बाब घडल्याचे ड्रीमप्लगने सांगितले. अॅक्सिस बँकेच्या नोंदीनुसार २०२१ मध्ये या खात्यांना चार युजर आयडी देण्यात आले होते. त्यापैकी केवळ दोनच सक्रिय आहेत. आरोपीने १५ कोटींचा व्यवहार करण्याचा प्रयत्न केल्याचे सांगण्यात आले. परंतु दोन युजर आयडी निष्क्रिय असल्याने केवळ १२ कोटी व्यवहार होऊ शकले.
देशभरातील अनेक खात्यांमधून पैसे काढण्यात आले. अॅक्सिस बँकेचे खाते कोठे कमी करण्यात आले, याचा शोध पोलिस घेत असून आरोपींनी पडताळणी प्रक्रियाही पूर्ण केली आहे. याशिवाय फसवणूक झालेले पैसे परत करण्याची प्रक्रियाही सुरू करण्यात आली आहे.
संबंधित बातम्या