Bangladesh Video : घरात घुसलेल्या आंदोलकांचा शेख हसीना यांच्या बेडरूममध्ये आराम, काहींनी त्यांच्या साड्या नेसल्या!
Bangladesh crisis : शेख हसीना बांगलादेशातून पळून गेल्यानंतर आंदोलकांनी पंतप्रधानांच्या राजवाड्यात घुसून त्यांच्या निवासस्थानाची तोडफोड केली, भांडी आणि कपडे चोरले. तसेच त्यांच्या बेडरुममध्ये घुसून त्यांच्या बेडवर आराम केला.
शेख हसीना यांनी पंतप्रधानपदाचा राजीनामा दिल्यानंतर बांगलादेशातील हिंसक निदर्शनांदरम्यान शेकडो आंदोलकांनी ढाक्यातील पंतप्रधानांच्या निवासस्थानावर हल्ला चढवला. हसीना यांच्या सरकारी निवासस्थानावरील व्हिडिओमध्ये आंदोलकांनी मालमत्तेची तोडफोड करताना, घरातील भांडी आणि कपडे चोरताना दिसत आहेत.
पंतप्रधान भवनात घुसलेल्या आंदोलकांचे फोटो आणि व्हिडिओ सोशल मीडियावर व्हायरल झाले, एका व्हिडिओ क्लिपमध्ये शेख हसीना यांच्या बेडरूममध्ये एक आंदोलक पलंगावर पडलेला दिसत आहे, तर काही माजी पंतप्रधानांच्या कपाटात आणि सामानात जात आहेत. हा व्हिडिओ सोशल मीडियावर व्हायरल झाला होता. या व्हिडिओच्या पार्श्वभूमीवर आंदोलक घरातील वस्तू फोडताना दिसत आहेत.
अधिकृत पंतप्रधान निवासस्थानाच्या आतील आणखी एका फोटोत शेख हसीना यांच्या खोलीत बेडवर तीन आंदोलक झोपलेले दिसत आहेत. आंदोलकांनी माजी पंतप्रधानांच्या राजकीय पक्षाशी संबंधित इतर इमारती आणि घरांमध्ये ही तोडफोड केली. काहींनी त्यांच्या साड्या नेसल्या. त्या त्यांच्या महागड्या साड्या घेऊन पळून जातानाचे व्हिडिओ समोर आले आहेत.
बांगलादेशच्या माजी पंतप्रधान शेख हसीना यांनी आपल्या पदाचा राजीनामा दिला आणि त्यांच्या राजीनाम्याची मागणी करत ढाक्यातील आरक्षण आंदोलनाला हिंसक वळण लागल्यानंतर त्यांनी सोमवारी देश सोडला. टीव्हीवर त्या बहिणीसोबत लष्करी हेलिकॉप्टरमध्ये चढताना दिसल्या होत्या.
हसीना यांचे विमान भारतात दाखल झाले आणि उत्तर प्रदेशातील गाझियाबाद येथील हिंडन एअर बेसवर उतरले. माजी पंतप्रधान लवकरच राजधानी दिल्लीला रवाना होतील आणि लवकरच लंडनला जाण्याची शक्यता आहे.
हसीना पळून गेल्यानंतर बांगलादेशचे लष्करप्रमुख जनरल वेकर-उझ-झमान यांनी चिंताग्रस्त देशाला आश्वासन देण्याचा प्रयत्न केला की, सुव्यवस्था पूर्ववत होईल. विरोधी पक्षनेते आणि नागरी समाजाच्या नेत्यांची भेट घेऊन अंतरिम सरकार स्थापन करण्याबाबत राष्ट्रपतींचे मार्गदर्शन घेणार असल्याचे त्यांनी सांगितले.
विद्यार्थ्यांच्या नेतृत्वाखाली सुरू असलेल्या निदर्शनांवर झालेल्या प्राणघातक कारवाईची लष्कर चौकशी करेल, असे आश्वासन जमान यांनी दिले. जमावावर गोळीबार न करण्याचे आदेश सुरक्षा दलांना दिल्याचे ही त्यांनी सांगितले. लष्करावर विश्वास ठेवा, आम्ही सर्व हत्यांची चौकशी करू आणि दोषींना शिक्षा करू, असे ते म्हणाले.