लाडकी बहीण योजना आता दिल्लीतही..! महिलांना दर महिना मिळणार २१०० रुपये, काय असणार अटी? जाणून घ्या संपूर्ण माहिती
ईशान्य दिल्लीतील बुराडी येथे 'आप'च्या पदयात्रा प्रचारादरम्यान केजरीवाल यांनी महिलांना म्हटले की, मी तुमच्यासाठी काम करत आहे. लवकरच तुमच्या खात्यात एक हजार रुपये येण्यास सुरुवात होईल.
ज्या योजनेमुळे देशातील अनेक राज्यांत सत्ताधारी पक्ष पुन्हा सत्तेत आले, तीच महिलांच्या बँक खात्यात पैसे जमा करणारी जादुई कॅश ट्रान्सफर स्कीम आता दिल्लीतही लागू करण्यात आली आहे. आम आदमी पक्षाचे संयोजक आणि माजी मुख्यमंत्री अरविंद केजरीवाल यांनी गुरुवारी दिल्लीत 'मुख्यमंत्री महिला सन्मान योजना' सुरू करण्याची घोषणा केली. या योजनेअंतर्गत महिलांना दरमहा एक हजार रुपयांची मदत दिली जाणार आहे. निवडणुकीनंतर ही रक्कम वाढवून २१०० रुपये करण्याचे आश्वासनही त्यांनी दिले.
आता ही योजना राबविली जात असली तरी ती आधी जाहीर करण्यात आली होती. त्याचबरोबर या योजनेचा लाभ मिळण्यासाठी घातलेल्या अटीही सांगण्यात आल्या. म्हणजेच या योजनेचा लाभ दिल्लीत राहणाऱ्या प्रत्येक महिलेला मिळणार नाही, तर त्यातील पात्रतेच्या अटींची पूर्तता करणाऱ्या महिलांनाच मिळणार आहे.
महिला व बालविकासने तयार केलेल्या या योजनेच्या मसुद्यानुसार दिल्लीच्या मतदार यादीत ज्यांची नावे समाविष्ट आहेत, त्यांनाच या योजनेचा लाभ मिळणार आहे. म्हणजेच 'मुख्यमंत्री महिला सन्मान योजने'चा लाभ मिळवण्यासाठी पहिली अट म्हणजे दिल्लीचा मतदार असणे.
ईशान्य दिल्लीतील बुराडी येथे नुकत्याच झालेल्या 'आप'च्या पदयात्रेच्या प्रचारादरम्यान महिलांमध्ये या योजनेचा उल्लेख करताना केजरीवाल म्हणाले होते, 'मी तुमच्यासाठी काम करत आहे. लवकरच तुमच्या खात्यात एक हजार रुपये येण्यास सुरुवात होईल. या योजनेसाठी नोंदणी प्रक्रिया सुरू होणार आहे. त्यासाठी अर्जदार हा दिल्लीतील नोंदणीकृत मतदार असणे आवश्यक आहे. जे नसतील, त्यांना स्थानिक आमदार मदत करतील.
महिला सन्मान राशीचा लाभ घेण्यासाठी अटी -
- वयाची कमीत कमी १८ वर्षे पूर्ण असावी.
- १२.१२.२०२४ रोजी वैध मतदार ओळखपत्रासह एनसीटी दिल्लीचा रहिवासी असणे आवश्यक आहे.
या महिलांना मिळणार नाही योजनेचा लाभ - - पूर्वीचे किंवा सध्याचे कायमस्वरूपी सरकारी कर्मचारी (केंद्र सरकार, राज्य सरकार किंवा स्थानिक स्वराज्य संस्था).
- विद्यमान किंवा माजी निवडून आलेल्या महिला प्रतिनिधी (खासदार, आमदार किंवा नगरसेवक).
- कोणतीही महिला ज्याने गेल्या आर्थिक वर्षात आयकर भरला आहे.
- जीएनसीटीडीच्या अपंग पेन्शन योजना, वृद्धापकाळ निवृत्तीवेतन आणि संकटग्रस्त महिलांना आर्थिक सहाय्य योजना या तीन सामाजिक सुरक्षा आर्थिक सहाय्य योजनांचे लाभार्थी.
मार्च मध्ये सादर करण्यात आलेल्या २०२४-२५ या आर्थिक वर्षाच्या अर्थसंकल्पात आम आदमी पक्षाच्या नेतृत्वाखालील सरकारने मुख्यमंत्री महिला सन्मान योजनेची घोषणा केली होती, ज्यात १८ वर्षांवरील प्रत्येक पात्र महिलेला दरमहा १,००० रुपये देण्याचे आश्वासन देण्यात आले होते.
निवडणुकीपूर्वी पैसे मिळणे कठीण -
योजनेची घोषणा करताना केजरीवाल म्हणाले की, आज मी दिल्लीच्या जनतेसाठी दोन मोठ्या घोषणा करण्यासाठी आलो आहे. या दोन्ही घोषणा दिल्लीतील महिलांसाठी आहेत. मी प्रत्येक महिलेच्या खात्यात दरमहा एक हजार रुपये जमा करेन, असे आश्वासन दिले होते. मला हे सांगताना अभिमान वाटतो की मुख्यमंत्री आतिशी यांच्या अध्यक्षतेखाली आज सकाळी दिल्ली मंत्रिमंडळाची बैठक झाली, ज्यात एक ठराव मंजूर करण्यात आला की दिल्लीतील प्रत्येक महिलेच्या खात्यात दरमहा १,००० रुपये जमा केले जातील.
केजरीवाल म्हणाले, "योजना तयार करताना अनेक महिला माझ्याकडे आल्या, ज्यांनी मला सांगितले की महागाई खूप जास्त झाली आहे, १००० रुपये चालणार नाहीत, म्हणून आज मी घोषणा करत आहे की उद्यापासून नोंदणी सुरू होईल आणि नोंदणी हजार-हजार नव्हे तर २१००-२१०० रुपयांसाठी असेल.
'आप'चे संयोजक अरविंद केजरीवाल यांनी 'महिला सन्मान योजने'चा शुभारंभ करताना महिलांना सांगितले की, येत्या दोन-तीन दिवसांत आम आदमी पक्षाचे कार्यकर्ते तुमच्या घरी येतील, तुमची नोंदणी करतील आणि तुम्हाला कार्ड देतील. यानंतर तुमच्या खात्यात पैसे येण्यास सुरुवात होईल. मात्र, ही योजना लागू करण्यात आली असली तरी लगेच पैसे येण्यास सुरुवात होणार नाही, असेही ते म्हणाले.
१०-१५ दिवसांत निवडणुका जाहीर होतील, त्यामुळे खात्यात पैसे ट्रान्सफर करणे सध्या शक्य नाही, असे केजरीवाल म्हणाले. यामुळे प्रक्रियेला तात्पुरता विलंब होऊ शकतो. 'मी भाजपला सांगू इच्छितो की, मी जादूगार आहे.
या योजनेची घोषणा करताना केजरीवाल म्हणाले की, "भाजप याला फ्री रेवडी म्हणते, पण मी याकडे आपल्या समाजाला बळकट करण्याच्या दिशेने टाकलेले एक पाऊल म्हणून पाहतो. भाजप विचारतो की पैसे कुठून आणणार, पण मी मोफत वीज देऊ असे सांगितले होते आणि आम्ही ते केले.
