Blood Waterfall in Antarctica: गेल्या ५०० वर्षांत मानवाने पृथ्वीच्या प्रत्येक खंडावर आपला ठसा उमटवला आहे. पण अंटार्क्टिका खंड हा अजूनही माणसासाठी एक कोडचं आहे. या ठिकाणी मोठ्या प्रमाणात बर्फ असून या कित्येक मीटर बर्फाखाली नेमकं काय लपलं आहे हे शोधणं शास्त्रज्ञांना देखील कठीण बनलं आहे. आजही पृथ्वीवरील सर्वात गूढ ठिकाण म्हणून अंटार्क्टिकाचं नाव घेतलं जातं. या गोठलेल्या खंडावरील अनेक रहस्ये हळूहळू उलगडत आहेत. ज्यामुळे शास्त्रज्ञांनाही आश्चर्याचा धक्का बसला आहे. या खंडावरचे असेच एक रहस्य म्हणजे येथे वाहणारा एक धबधबा ज्याला रक्ताचा धबधबा असं म्हटलं जातं.
अंटार्क्टिकाच्या टेलर ग्लेशियरच्या खालून वेस्ट लेक बोनीमध्ये वाहणारा हा धबधबा त्याच्या लाल रंगामुळे चर्चेत आला आहे. सुमारे ११० वर्षांपूर्वी ऑस्ट्रेलियन भूगर्भशास्त्रज्ञ थॉमस ग्रिफिश टेलर यांनी अंटार्क्टिका दौऱ्यात या धबधब्याचा शोध लावला होता. १९११ मध्ये टेलर आणि त्यांच्या टीमला लाल रंग दिसला आणि ते आश्चर्यचकित झाले.
लाल शेवाळ मुबलक असल्याने येथील बर्फाचा रंग रक्तासारखा लाल झाला आहे, असे सुरुवातीला भूगर्भशास्त्रज्ञांचे मत होते. पण नंतर २००३ मध्ये एका दशकानंतर सत्य समोर आले. २००३ मध्ये एका गटाने त्याच्या लाल रंगाची तपासणी केली. या तपासणीत धबधब्यात लोह ऑक्साईडचे प्रमाण खूप जास्त असल्याचे समोर आले. हिमनगाखालील खारट पाणी हवेच्या संपर्कात आल्यास ते अकार्बनी संयुगे तयार करू शकतात व त्यामुळे याच रंग लाल झाला असल्याची माहिती संशोधकांनी दिली होती. संशोधनानुसार येथे एक्स्ट्रामोफिल मायक्रोबियल इकोसिस्टम आहे, ज्यामुळे येथील मिठाचे प्रमाण समुद्री मीठापेक्षा खूप जास्त आहे.
हिमनगाखालील लोहयुक्त पाणी बर्फातून बाहेर पडते. वरील मीठ व हवेच्या संपर्कात येताच ते हवेतील ऑक्सिजनशी अभिक्रिया करतात. त्यामुळे त्याचा रंग लाल दिसतो. शतकानुशतके बर्फात राहिल्याने येथे उपस्थित उर्वरित प्राण्यांनी थंडीशी जुळवून घेतले आहेत. या खंडावर मोठ्या प्रमाणात संशोधन सुरू आहे. आजही या ठिकाणी मोठ्या प्रमाणात शास्त्रज्ञ येत असून ते येथे विविध प्रयोग करत आहेत.
संबंधित बातम्या