UPA सरकारच्या काळात झाल्या ६ सर्जिकल स्ट्राईक, थरूर वादाच्या पार्श्वभूमीवर काँग्रेसचा दावा, भाजपचा प्रतिहल्ला

थरूर यांनी २०१६ मध्ये केलेल्या सर्जिकल स्ट्राईकबाबत केलेल्या वक्तव्यानंतर या संपूर्ण प्रकरणाची सुरुवात झाली. काँग्रेसच्या अनेक नेत्यांनी थरूर यांच्या या वक्तव्याचे भरभरून कौतुकही केले होते. काँग्रेसचे सरचिटणीस रणदीप सिंह सुरजेवाला म्हणाले की, शशी थरूर आमच्या कुटुंबाचा भाग आहेत, पण सर्जिकल स्ट्राईकबाबत त्यांनी केलेले वक्तव्य तथ्यहीन आहे. कॉंग्रेस पक्षाच्या नेत्यांनी त्यात तथ्यात्मक सुधारणा केली आहे. यूपीए सरकारच्या काळातही सर्जिकल स्ट्राईक करण्यात आले आहेत.

काँग्रेस पक्षाने सोशल मीडियावर एक व्हिडिओ शेअर करत लिहिले की, "नो नोएडा, नो पीआर... फक्त निर्णायक कारवाई." काँग्रेस सरकारच्या काळात सहा सर्जिकल स्ट्राईक करण्यात आले.

हा व्हिडिओ शेअर होताच भारतीय जनता पक्षाने काँग्रेसवर टीका करण्यास सुरुवात केली आहे. २०१८ च्या आरटीआयचा हवाला देत पक्षाने लिहिले की, "आरटीआयला उत्तर देताना डीजीएमओने स्पष्ट केले होते की यूपीए सरकारच्या काळात सर्जिकल स्ट्राईक झाला नाही.

भाजपने सोशल मीडियाच्या माध्यमातून काँग्रेसवर निशाणा साधत लिहिले की, 'डरपोक काँग्रेसने खोटे बोलणे थांबवावे.

काँग्रेसने सांगितली नावे

एचटीच्या वृत्तानुसार, काँग्रेस नेते राहुल गांधी यांनी २०१८ मध्ये दावा केला होता की, यूपीए सरकारच्या काळात लष्कराने पाकव्याप्त काश्मीरवर तीन सर्जिकल स्ट्राईक केले होते. नुकतेच काँग्रेस पक्षाने पुन्हा एकदा ६ सर्जिकल स्ट्राईकचा दावा केला आहे. यूपीए सरकारच्या काळात सर्जिकल स्ट्राईक करण्यात आल्याचा दावा करत काँग्रेसने १९ जून २००८ रोजी पूंछच्या भट्टल सेक्टरमध्ये ३१ ऑगस्ट ते १ सप्टेंबर २०११ दरम्यान केलमधील नीलम नदीच्या खोऱ्यात, ६ जानेवारी २०१३ रोजी सावन पात्रा चेकपोस्टवर आणि २७-२८ जुलै २०१३ रोजी नाजपीर सेक्टरमध्ये केलेल्या छाप्यांची यादीही शेअर केली. नीलम खोऱ्यात ६ ऑगस्ट २०१३ आणि १४ जानेवारी २०१४ रोजी सर्जिकल स्ट्राईक करण्यात आला होता.