कुवेतमधील कामगारांच्या इमारतीला भीषण आग; ४० भारतीयांचा होरपळून मृत्यू, ५० गंभीर
कुवैतचे गृहमंत्री शेख फहाद अल-युसूफ अल-सबाह यांना अल-मंगफ इमारतीचे मालक आणि चौकीदार यांना पकडण्याचे आदेश पोलिसांना दिले आहेत
कुवेतमधून एक मोठे वृत्त समोर आले असून येथील दक्षिण अहमदी प्रांतातील मंगफ भागात असलेल्या एका सहा मजली इमारतीला भीषण आग लागली आहे. या आगीत ४० भारतीय मजुरांचा होरपळून मृत्यू झाल्याचे सांगितले जात आहे. या इमारतीत राहणारे सर्व रहिवाशी एकाच कंपनीत कामाला आहेत. बुधवारी सकाळी या कामगारांच्या इमारतीच्या स्वयंपाकघरात भीषण आग लागली व संपूर्ण इमारतीत पसरली.
दक्षिण कुवेतमधील भारतीय कामगारांच्या इमारतीला लागलेल्या भीषण आगीत ५० जण जखमी झाले आहेत. कामगारांचे निवासस्थान असलेल्या अल-मंगफ इमारतीला लागलेल्या आगीची माहिती अल-अहमदी प्रांतातील अधिकाऱ्यांना पहाटे साडेचार वाजता देण्यात आली आणि बहुतांश मृत्यू हे रहिवासी झोपलेले असताना धुरामुळे झाले, असे कुवैती माध्यमांनी म्हटले आहे.
एनबीटीसी ग्रुप या अभियांत्रिकी आणि बांधकाम कंपनीने १९५ हून अधिक कामगारांना राहण्यासाठी ही इमारत भाड्याने दिली होती, ज्यात बहुतेक केरळ, तामिळनाडू आणि उत्तरेकडील राज्यांमधील भारतीय होते. मृतांमध्ये २० ते ५० वयोगटातील लोकांचा समावेश आहे.
या घटनेबाबत पंतप्रधान मोदींनी दु:ख व्यक्त केले आहे. कुवेतमधील भारतीय दूतावास परिस्थितीवर बारकाईने लक्ष ठेवून असून तेथील अधिकाऱ्यांसोबत बाधितांच्या मदतीसाठी काम करत असल्याचे पंतप्रधान नरेंद्र मोदी यांनी सांगितले. कुवैत सिटीमध्ये लागलेली आगीची दुर्घटना दु:खद आहे. ज्यांनी आपल्या जवळच्या व्यक्तींना गमावले आहे त्यांच्यासमवेत माझ्या संवेदना आहेत. मी प्रार्थना करतो की जखमी लवकरात लवकर बरे व्हावेत," असे त्यांनी एक्स वर पोस्ट मध्ये म्हटले आहे.
'कुवैतमध्ये लागलेल्या आगीच्या घटनेच्या बातमीने खूप धक्का बसला आहे. या दुर्घटनेत ४० जणांचा मृत्यू झाला असून ५० हून अधिक जणांना रुग्णालयात दाखल करण्यात आले आहे, अशी माहिती परराष्ट्र मंत्री एस. जयशंकर यांनी दिली आहे.
या दुर्घटनेत ४० भारतीय नागरिकांचा मृत्यू झाला असून ५० हून अधिक जण जखमी झाल्याची माहिती सूत्रांनी नाव न छापण्याच्या अटीवर दिली. मृत आणि जखमींना अनेक रुग्णालयात दाखल करण्यात आल्याने मृतांचा तपशील गोळा केला जात आहे.
कुवैतमधील भारताचे राजदूत आदर्श स्वैका यांनी घटनास्थळी भेट देऊन माहिती गोळा केली, अशी माहिती जयशंकर यांनी दिली. 'मृत्यूमुखी पडलेल्यांच्या कुटुंबियांप्रती संवेदना व्यक्त करतो. जे जखमी झाले आहेत त्यांना लवकरात लवकर आणि पूर्ण बरे होण्यासाठी शुभेच्छा. यासाठी आमचा दूतावास सर्व संबंधितांना पूर्ण सहकार्य करेल, असे जयशंकर म्हणाले.
जखमी भारतीय नागरिकांना मुबारक अल-कबीर रुग्णालयात दाखल करण्यात आले असून त्यापैकी १० जणांना आज सोडण्यात येणार आहे. आणखी सहा जखमींना फरवानिया रुग्णालयात दाखल करण्यात आले असून त्यातील चौघांना नंतर सोडण्यात आले, तर एकाला जहरा रुग्णालयात हलविण्यात आले. ३० हून अधिक जखमी भारतीयांना अल-अदान रुग्णालयात दाखल करण्यात आले असून त्यातील बहुतेकांची प्रकृती स्थिर असल्याचे अधिकाऱ्यांनी सांगितले.
भारतीय दूतावासाने एक्सवरील पोस्टमध्ये म्हटले आहे की ते आवश्यक कारवाई आणि आपत्कालीन वैद्यकीय सेवेसाठी कुवेतकायदा अंमलबजावणी, अग्निशमन सेवा आणि आरोग्य अधिकाऱ्यांच्या संपर्कात आहेत.
अग्निशमन दलाच्या जवानांनी आग आटोक्यात आणण्याचा प्रयत्न केला असता इमारतीतून मोठ्या प्रमाणात आग आणि काळा धूर निघत असल्याचे सोशल मीडियावर शेअर करण्यात आलेल्या फुटेजमध्ये दिसत आहे.
कुवैतचे गृहमंत्री शेख फहाद अल-युसूफ अल-सबाह यांनी पोलिसांना अल-मंगफ इमारतीचे मालक आणि चौकीदार तसेच इमारतीत राहणाऱ्या कामगारांच्या मृत्यूसाठी जबाबदार असलेल्या कंपनीच्या मालकाला अटक करण्याचे आदेश दिले आहेत.
अल-सबाह यांनी कुवैत नगरपालिका आणि सार्वजनिक प्राधिकरणाला आदेश दिले आहेत की ज्या ठिकाणी मोठ्या संख्येने कामगार एकाच निवासी इमारतीत अडकले आहेत अशा उल्लंघनांवर त्वरित कारवाई करण्याचे आणि अशा घटना टाळण्यासाठी सुरक्षेच्या सर्व अटी ंची खात्री करण्याचे आदेश दिले आहेत.
कुवैत नगरपालिकेचे महासंचालक सौद अल-डब्बूस यांनी अल-अहमदी प्रांताचे उपमहासंचालक, अल-अहमदी नगरपालिकेचे कार्यकारी संचालक, लेखापरीक्षण आणि अभियांत्रिकी विभागाचे संचालक आणि उल्लंघन निर्मूलन विभागाचे प्रमुख यांच्यासह अनेक अधिकाऱ्यांना निलंबित करण्याचे आदेश जारी केले.
संबंधित बातम्या