Worli Election : आदित्य ठाकरे यांना मतदारसंघातच अडकवण्यासाठी सापळा; शिंदे सेनेनं वरळीत उतरवला तगडा उमेदवार
वरळी विधानसभा मतदारसंघातून एकनाथ शिंदे यांच्या शिवसेनेनं मिलिंद देवरा यांना उमेदवारी दिली आहे. खुद्द देवरा यांनी तसं ट्विट केलं आहे.
Aaditya Thackeray : मुंबईतील माहीम पाठोपाठ वरळी मतदारसंघातील लढत देखील विधानसभा निवडणुकीतील सर्वात लक्षवेधी लढत ठरणार आहे. एकनाथ शिंदे यांच्या सेनेनं या मतदारसंघातून आदित्य ठाकरे यांच्या विरोधात मिलिंद देवरा यांना उतरवण्याचा निर्णय घेतला आहे. आदित्य ठाकरे यांना मतदारसंघातच अडकवण्याची ही खेळी असल्याचं बोललं जात आहे.
आदित्य ठाकरे हे वरळी विधानसभेचे विद्यमान आमदार आहेत. ते पुन्हा याच मतदारसंघातून रिंगणात असून उमेदवारी अर्जही दाखल केला आहे. त्यांच्या विरोधात तगडा उमेदवार देण्यासाठी महायुतीकडून शोध सुरू होता. सुरुवातीला शायना एनसी यांच्या नावाची चर्चा होती. मात्र हा मतदारसंघ शिंदे सेनेच्या वाट्याला आल्यानं त्यांनी देवरा यांना इथून रिंगणात उतरवलं आहे.
इट्स नाऊ वरली!
मिलिंद देवरा यांनी स्वत: सूचक ट्वीट केलं आहे. ‘वरळी आणि वरळीवासीयांना न्याय देण्याची वेळ आली आहे. आम्ही त्यासाठी प्रयत्नशील आहोत. वरळीच्या विकासासाठी आमचं व्हिजन लवकरच जाहीर करू. आता वरळी!,’ असं देवरा यांनी ट्वीटमध्ये म्हटलं आहे.
मिलिंद देवरा हे माजी केंद्रीय राज्यमंत्री असून सध्या राज्यसभेचे खासदार आहेत. वर्षभरापूर्वी काँग्रेसला रामराम करत त्यांनी शिंदे सेनेत प्रवेश केला होता. त्यांना राज्यसभेची खासदारकीही देण्यात आली. मात्र, आदित्य ठाकरे यांच्या विरोधात दुसरा तगडा उमेदवार मिळत नसल्यानं त्यांना इथून संधी देण्यात आली आहे.
आदित्य ठाकरे निर्धास्त का?
२०१९ च्या विधानसभा निवडणुकीत पहिल्यांदा आदित्य ठाकरे वरळीतून निवडणूक लढले होते. त्यावेळी भाजप व शिवसेनेची युती होती. त्यावेळी देखील आदित्य ठाकरे यांना फारसं आव्हान नव्हतं. त्यानंतरची अडीच वर्षे महाविकास आघाडीचं सरकार होतं. आदित्य ठाकरे हे स्वत: मंत्री होते. या काळात वरळीतील बीडीडी चाळीसह अनेक महत्त्वाचे प्रश्न मार्गी लागले आहेत.
वरळीत ठाकरेंच्या शिवसेनेचं चांगलं वर्चस्व आहे. या मतदारसंघातून पूर्वी आमदार राहिलेले सुनील शिंदे, सचिन अहिर हे सध्या ठाकरेंसोबतच असून दोघेही विधान परिषदेवर आमदार आहेत. याशिवाय, माजी महापौर किशोरी पेडणेकर यांचा वॉर्ड देखील याच मतदारसंघात आहे. पक्ष संघटना आणि कामाच्या बळावर इथून सहज विजय मिळेल असा विश्वास आदित्य ठाकरे यांना आहे.
मनसेचा किती प्रभाव?
राज ठाकरे यांच्या मनसेनं वरळीत माजी नगरसेवक संदीप देशपांडे यांच्या रूपानं उमेदवार दिला आहे. संदीप देशपांडे हे दादर भागातील माजी नगरसेवक आहेत. मागील निवडणुकीत मनसेनं वरळीत उमेदवार दिला नव्हता, त्यामुळं इथं पक्षाची नेमकी ताकद किती आहे याचा अंदाज नाही. आदित्य ठाकरे आणि मिलिंद देवरा यांच्या लढाईत मनसेचा उमेदवार किती प्रभाव पाडतो याबद्दलही उत्सुकता आहे.
संबंधित बातम्या