अभिनेता सुनील दत्त यांनी बाबा सिद्दिकींना आणलं होतं राजकारणात; मुंबई मनपाचे नगरसेवक ते मंत्रीपदापर्यंतचा प्रवास

अभिनेते सुनील दत्त यांनी आणलं होतं बाबा सिद्दिकींना राजकारणात

बाबा सिद्दिकी यांनी आपल्या राजकीय कारकिर्दीची सुरूवात मुंबईतील वांद्रे भागातून कॉंग्रेस पक्षाच्या माध्यमातून केली होती. विद्यार्थी दशेत ते एनएसयूआयमध्ये सक्रिय होते. १९८८ साली ते मुंबई यूथ कॉंग्रेसचे अध्यक्ष म्हणून निवडले गेले. त्यानंतर दोन वेळा मुंबई महानगरपालिकेत नगरसेवक म्हणून ते निवडून आले होते. वांद्रे भागात सुनील दत्त यांच्या समाजकार्याने ते प्रभावित होते. १९८७ साली पंजाब अशांत असताना सुनील दत्त यांनी मुंबई ते अमृतसर अशी २००० किमीची ‘महाशांती पदयात्रा’ काढली होती. या पदयात्रेत बाबा सिद्दिकी यांनी सहभाग घेतला होता. बाबा सिद्दिकी हे अभिनेते सुनील दत्त यांना नेहमी आपले राजकीय गुरू मानायचे. दत्त कुटुंबातील अभिनेता संजय दत्त, माजी खासदार प्रिया दत्त यांच्याशी त्यांचे घनिष्ठ संबंध होते.

हे वाचाः राष्ट्रवादीचे नेते बाबा सिद्दीकी यांची मुंबईत गोळ्या घालून हत्या, परिसरात खळबळ

नगरसेवक ते मंत्रीपदापर्यतचा प्रवास

बाबा सिद्दिकी हे १९९३ आणी १९९८ साली मुंबई महानगरपालिकेत नगरसेवक म्हणून निवडून आले होते. त्यानंतर वांद्रे -पश्चिम मतदारसंघातून १९९९, २००४ आणि २००९ असे तीन वेळा कॉंग्रेस पक्षाचे आमदार म्हणून निवडून आले होते. २००४ ते २००८ दरम्यान बाबा सिद्दिकी यांनी राज्याचे अन्न, नागरी पुरवठा व कामगार खात्याचे राज्यमंत्री म्हणून काम केले होते.  २०००-२००४ दरम्यान ते म्हाडाच्या मुंबई बोर्डचे चेअरमन होते. 

४८ वर्षानंतर दिलेली कॉंग्रेसला सोडचिट्ठी

बाबा सिद्दिकी यांनी नुकतेच कॉंग्रेस पक्षाला सोडचिट्ठी देऊन राष्ट्रवादी कॉंग्रेस (अजित पवार) गटात सामिल झाले होते. बाबा सिद्दिकी यांचे पुत्र झिशान सिद्दिकी हे वांद्रे (पूर्व) येथून कॉंग्रेसचे आमदार आहेत. कॉंग्रेस पक्षाने नुकताच झिशान सिद्दिकी यांच्यावर पक्षविरोधी कारवाया करत असल्याचा ठपका ठेवत कॉंग्रेसमधून हकालपट्टी केली होती. आगामी विधानसभा निवडणुकीत झिशान सिद्दिकी हे अजित पवार गटाकडून लढणार असल्याचे बोलले जात आहे.

हे वाचाः इफ्तार 'किंग' बाबा सिद्दिकींच्या पार्टीत असायची सेलिब्रिटींची मांदियाळी

हे वाचाः अदानी आमची जान आणि आम्ही शेटजींचे श्वान...; उद्धव ठाकरे