वर्ध्यात विचित्र अपघात.. दोन टिप्पर, कार अन् दुचाकीच्या धडकेत तीन जणांचा मृत्यू

टिप्परने कारला दिलेली धडक इतकी भीषण होती की, कारच्या समोरील भागाचा अक्षरश: चेंदामेंदा झाला आहे. विजय देवतळे (वय ४५), अक्षय कोलकडे (वय २५, दोघे रा. येरणगाव)  आणि  राहुल नैताम (वय २७ रा. अलमडोह) अशी मृतांची नावे आहे. रतन पचारे आणि अर्जुन मोरे (३५) या अपघातात गंभीर जखमी झाले आहेत. जखमींवर वडनेर येथील सरकारी रुग्णालयात प्राथमिक उपचार केल्यानंतर त्यांना सेवाग्राम येथील रुग्णालयात हलवण्यात आले आहे. 

वडनेर ते शिरसगाव रस्त्यावर येरणगाव  येथे एक टिप्पर शनिवारी सकाळपासून नादुरुस्त स्थितीत रस्त्याकडेला उभा होता. त्यावेळी पाठीमागून भरधाव आलेली दुचाकी टिप्परवर आदळली. यात दुचाकीस्वार गंभीर जखमी झाला. एकजण रस्त्यात जखमी अवस्थेत पडल्याचे पाहून शिरसगावकडून येणारी एक कार त्याच्या मदतीसाठी थांबली. 

कार थांबवून कारचालक जखमी मोटारसायकलस्वाराच्या मदतीला धावला. जखमी व्यक्तीला घेऊन कारमध्ये बसवत असतानाच वडनेरकडून भरधाव येणाऱ्या वाळूने भरलेल्या टिप्परचालकाने कारला चिरडले. या अपघातात तिघांचा जागीच मृत्यू झाला. यात कारचालक व मोटारचालकाचा समावेश आहे.