ती शाळा भाजप कार्यकर्त्याची, त्यालाही निबंध लिहायला लावणार का? बदलापूर प्रकरणावर ठाकरेंची संतप्त प्रतिक्रिया

बदलापूर मधील ज्या शाळेत ही संतापजनक घटना घडली ती शाळा भाजपशी संबंधित लोकांची आहे, असा गंभीर आरोप उद्धव ठाकरे यांनी केला आहे. 'मातोश्री'येथे प्रसारमाध्यमांशी संवाद साधताना उद्धव ठाकरे म्हणाले, की एका बाजूने आपण राज्यात लाडकी बहीण योजना आणत असतानाच आपल्या राज्यात या लाडक्या बहिणीच नव्हे तर त्यांच्या छोट्या-छोट्या मुलीही असुरक्षित आहेत. त्यांच्यावर अत्याचार होत आहेत. या घटनेला जबाबदार असलेल्यांविरोधात लवकरात लवकर खटला चालवावा. मग ते फास्ट ट्रॅक कोर्ट असो किंवा इतर माध्यमातून असो.

उद्धव ठाकरे म्हणाले, आपल्याकडे अनुभव आहे. काही वर्षापूर्वी दिल्लीमध्ये निर्भयाकांड झालं होतं. निर्भयाचे आरोपी पकडले. गुन्हे सिद्ध झाले. पण त्याच्या आरोपींना किती वर्षांनी फाशी दिली गेली? या दिरंगाईला जबाबदार कोण?, असा सवालही ठाकरे यांनी उपस्थित केला आहे.

अशा घटनांचं राजकारण करता कामा नये. आम्ही आमच्या कार्यकाळात शक्ती विधेयक आणणार होतो. विधेयकाचा मसुदा तयार होता. मात्र कोरोनामुळे विधानसभेचे अधिवेशन केवळ दोन ते तीनच दिवस झाले. त्यानंतर आमचे सरकार पाडले व हे विधेयक रखडवले. हे विधेयक आणून बलात्काऱ्यांना या शक्ती विधेयकाची खरी शक्ती दाखवून देण्याची जबाबदारी सरकारची आहे, असं उद्धव ठाकरे म्हणाले.

बदलापुरात आंदोलकांचा रुद्रावतार; गिरीश महाजनांच्या दिशेने भिरकावली बाटली, महिला म्हणाली “या जागी तुमची मुलगी असती तर..”

आता आरोपीला निबंध लिहायला लावून सोडणार का?

उद्धव ठाकरे म्हणाले की, मी असं ऐकलं आहे की, मुलींवर अत्याचार झालेली बदलापूरची ती शाळा भाजपशी संबंधित कार्यकर्त्याची आहे. भाजपचा पदाधिकारी शाळेचा संचालक आहे. मी यात राजकारण आणत नाही. माझा तसा हेतूही नाही. मात्र कोणताही कार्यकर्ता असला अगदी भाजपाचा कार्यकर्ता असला तरी विनाविलंब त्याच्याविरुद्ध कारवाई झाली पाहिजे. वरळीतील हिट अँड रन प्रकरणातील आरोपी मिहीर शाह देखील आता मुक्त आहे. कदाचित त्यालाही निबंध लिहायला सांगितला असावा. त्याचप्रमाणे आता यात भाजपाचे कार्यकर्ते असतील तर निबंध लिहून घेऊन त्यांना सोडून देणार आहात का? असा खोचक सवाल उद्धव ठाकरे यांनी केला आहे.

ठाकरेंच्या आरोपाला फ़णवीसांचं उत्तर -

उद्धव ठाकरे हे माजी मुख्यमंत्री आहेत. त्यांच्यासारख्या व्यक्तीने इतक्या खालच्या दर्जाचं राजकारण करणं त्यांना शोभत नाही. ही खूप संवेदनशील घटना आहे. अशा प्रसंगी उद्धव ठाकरेंसारख्या मोठ्या राजकीय नेत्यांनी राजकीय वक्तव्ये न करता,राजकारण न करता एखाद्या उत्तम राज्यकर्त्यांसारखं वागलं पाहिजे, असं प्रत्युत्तर देवेंद्र फडणवीस यांनी उद्धव ठाकरेंना दिलं आहे.

पोलिसांनी चिमुकल्यांचा पालकांना १३ तास ताटकळत ठेवलं - अनिल देशमुखांचा आरोप

बदलापूरमध्ये राज्याला हादरवणारी अत्यंत संतापजनक घटना घडली आहे. दोन चिमुकल्यांसोबत शाळेतील कर्मचाऱ्याने दुष्कृत्य केले. ही घटना उजेडात आल्यानंतर याची तक्रार करण्यासाठी गेलेल्या पालकांना १३ तास पोलीस स्टेशनला ताटकळत ठेवले गेले, हे सुद्धा संतापजनक आहे. घटना इतकी संवेदनशील असताना पोलिसांनी गुन्हा दाखल करण्यासाठी १३ तास का लावले?कुठलाही मुलाहिजा न ठेवता या घटनेतील दोषींवर कठोर कारवाई व्हायला हवी,अशी मागणी माजी गृहमंत्री अनिल देशमुख यांनी केली आहे.