पुढील बातमी

class="fa fa-bell">ठळक बातम्या:

सांगलीतील २४ रुग्ण कोरोनामुक्त, मंत्र्यांकडून डॉक्टरांचे अभिनंदन

कोरोना विषाणू बाधितांसाठीचे आयसोलेशन वॉर्ड (संग्रहित छायाचित्र)

सांगली जिल्ह्यातील इस्लामपूर येथे २५ कोविड-१९ रुग्ण आढळून आल्याने खळबळ उडाली होती. या सर्व रुग्णांना मिरज येथील शासकीय वैद्यकीय महाविद्यालयाच्या रुग्णालयात दाखल करण्यात आले होते. या रुग्णांपैकी चोवीस रुग्णांची दुसरी चाचणी गुरुवारी निगेटिव्ह आली. या पार्श्वभूमीवर वैद्यकीय शिक्षण मंत्री अमित विलासराव देशमुख यांनी रुग्णांवर उपचार करणाऱ्या पथकाचे अभिनंदन केले आहे.

लॉकडाऊन उठल्यावर इंडिगोच्या विमानसेवेत मोठे बदल

मिरज येथे मोठ्या प्रमाणात रुग्ण आढळल्याने या घटनेची अमित देशमुख यांनी गंभीर दखल घेतली होती. सांगली जिल्ह्यातील कोविड-१९ ग्रस्त रुग्णांच्या संख्येत आणखी वाढ होऊ नये यादृष्टीने मिरजेतील शासकीय वैद्यकीय महाविद्यालयात दाखल झालेल्या कोरोनाग्रस्त रुग्णांवर तातडीने उपचार करून त्यांना पूर्णपणे बरे करण्याच्या दृष्टीने मुंबईतील ग्रँड शासकीय वैद्यकीय महाविद्यालयाच्या अधिष्ठाता डॉक्टर पल्लवी सापळे यांच्या अध्यक्षतेखाली याच महाविद्यालयातील सहयोगी प्राध्यापक डॉ. विनायक सावर्डेकर आणि डॉ. प्रशांत होवाळ यांची त्रिसदस्यीय समिती नेमली होती. या समितीने तातडीने सांगली येथे जाऊन परिस्थितीवर नियंत्रण व उपचाराच्या नियोजनाचे काम २८ मार्च रोजी हाती घेतले होते.

सांगली जिल्ह्यातील कोविड-१९ ग्रस्त रुग्णांची संख्या लक्षात घेता गरज भासल्यास मिरज येथील शासकीय वैद्यकीय रुग्णालयाचे ३१५ खाटांच्या कोविड-१९ रुग्णालयात तातडीने रूपांतर करण्यात आले होते. याच ठिकाणी सिटीस्कॅन, एमआरआय लिक्विड ऑक्सिजन, सोनोग्राफी, डायलिसिस व १५ बेडचे आयसीयू सज्ज ठेवण्यात आले होते. याशिवाय कोविड-१९ तपासणी केंद्र तातडीने उभारून ते सुरूही करण्यात आले होते. या रुग्णालयात दाखल झालेले आणखी दोन कोविडग्रस्त रुग्णही लवकर बरे होतील आणि सांगली जिल्हा पूर्णपणे कोविड-१९ मुक्त करण्यात आम्ही यशस्वी होऊ, असा विश्वास डॉक्टर पल्लवी सापळे यांनी व्यक्त केला आहे.

कोरोनावर नियंत्रण मिळवण्यात भारत मोठ्या प्रमाणात यशस्वी, तरीही...

सांगली येथे एकूण २५ कोविड-१९ ग्रस्त रुग्ण दाखल करण्यात आले होते यानंतर यात एका रुग्णांची भर पडली होती. ज्या २४ रुग्णांचे रिपोर्ट निगेटिव्ह आले आहेत त्यांचे १४ दिवसांसाठी संस्थात्मक विलगीकरण करण्यात येणार असून त्यानंतर त्यांना घरी सोडण्यात येणार आहे.