‘कहाणी पाबळच्या विज्ञान आश्रमाची’ पुस्तकाला डाॅ. कुमुद बन्सल उत्कृष्ट शैक्षणिक ग्रंथ पुरस्कार

उत्कृष्ट शैक्षणिक ग्रंथ पुरस्कार २०२४ ची निवड करण्यासाठी जी समिती निर्माण करण्यात आली होती, त्या समितीने राज्यभरातून आलेल्या ७२ ग्रंथाचे आशय, निर्मितीमूल्य, मांडणी आणि उपयुक्तता या चार निकषाच्या आधारे परीक्षण केले. या पुस्तकांमध्ये शिक्षण विषयक एखादा नवीन प्रयोग किंवा विचार मांडण्यात आला आहे का? तो प्रयोग इतर शिक्षकांना मार्गदर्शक ठरण्याजोगा आहे का? याचे परीक्षण करून आणि या पुस्तकांमधून शिक्षकांसाठी उपयुक्त ठरणाऱ्या कोणत्या गोष्टी आहेत याचा विचार करून शेवटी समितीने समकालीन प्रकाशन प्रकाशित 'कहाणी पाबळच्या विज्ञान आश्रमाची' या डाॅ.योगेश कुलकर्णी लिखित पुस्तकाला डाॅ.कुमुद बन्सल उत्कृष्ट शैक्षणिक ग्रंथ पुरस्कार २०२४ मिळाल्याचे जाहीर केले.

या पुस्तकांमधून ग्रामीण भागामध्ये ग्रामीण तंत्रज्ञानाचे प्रयोग डॉ. योगेश कुलकर्णी यांनी यशस्वीपणे पुढे कसे नेले? ग्रामीण तंत्रज्ञानाच्या प्रयोग करून विविध व्यवसाय कशाप्रकारे विकसित झाले, ग्रामीण तरूणांना रोजगार कशाप्रकारे प्राप्त झाला, त्यांच्यातील आत्मविश्वास आणि संशोधनवृत्ती कशी वाढीस लागली याची यशोगाथा या पुस्तकातून मांडण्यात आली आहे. राष्ट्रीय शैक्षणिक धोरण २०२० मध्ये मांडण्यात आलेल्या व्यवसाय शिक्षणाबाबतच्या विचारांना प्रत्यक्षात आणण्याचे काम विज्ञानश्रमाने गेली कित्येक दशके आधीपासून सुरू केले आहे. या प्रयोगाचा लेखाजोखा या पुस्तकात मांडण्यात आला आहे.

हे वाचाः तुम्हीही आहात पुस्तकप्रेमी? तर 'ही' पुस्तके आयुष्यात एकदा तरी अवश्य वाचा

तीन पुस्तके ठरली लक्षवेधक पुस्तके

या पुस्तकाव्यतिरिक्त आणखी तीन पुस्तकांची लक्षवेधक पुस्तके म्हणून निवड करण्यात आली. या पुस्तकांना मानचिन्ह व प्रमाणपत्र देण्यात येणार आहे. यात (१) धमाल भटकंती कमाल शिकण्याची- शिवराज पिपडे - ज्ञान प्रबोधिनी प्रकाशन, पुणे (२) घाट शिकण्या शिकवण्याचा- सुचिता पडळकर आणि इंद्रजीत भोसले, सृजन आनंद विदयालय, कोल्हापूर (३) माझे शाळेतील प्रयोग-स्मिता गौड, राजहंस प्रकाशन, पुणे या पुस्तकांचा समावेश आहे. या पुस्तकांत मांडण्यात आलेले उपक्रम व लेखकांचे अनुभव शिक्षकांना प्रेरणादायक आणि अनुकरण करण्यासारखे आहेत.

सदरील पुरस्कार रविवार, दिनांक ५ जानेवारी २०२५ रोजी शिक्षण विकास मंच, यशवंतराव चव्हाण सेंटर आयोजित पंधराव्या राज्यस्तरीय शिक्षण परिषदेत मान्यवरांच्या उपस्थितीत प्रदान करण्यात येणार असल्याची माहिती डॉ. माधव सूर्यवंशी, मुख्य समन्वयक, शिक्षण विकास मंच, यशवंतराव चव्हाण सेंटर, मुंबई यांनी दिली आहे.

हे वाचाः श्रीमंत आणि यशस्वी व्हायचं असेल, तर ही जगप्रसिद्ध पुस्तके एकदा वाचाच