पाकिस्तानही प्रत्युत्तर देईल, शांत बसणार नाही; पहलगाम हल्ल्यावरून शरद पवारांनी केंद्राला घेरलं

पाकिस्तान विरोधात कडक कारवाई -

काश्मीरमधील पर्यटनस्थळ पहलगाम येथे झालेल्या दहशतवादी हल्ल्यात २६ पर्यटक ठार झाले होते. या हल्ल्यानंतर भारत सरकारने पाकिस्तान विरोधात कडक कारवाई केली आहे. यात सिंधू पाणी करार स्थगित करणे, राजनैतिक संबंध आणखी कमी करणे आणि पाकिस्तानी नागरिकांचे व्हिसा रद्द करणे यांचा समावेश आहे.

दोन्ही देशांमधील एकमेव भू सीमा वाघा-अटारी सीमा बंद करण्यात आली आहे. आधीच मर्यादित असलेल्या राजदुतांची संख्या ५५ वरून ३० करण्यात आली आहे. पाकिस्ताननेही भारताच्या या कारवाईला प्रत्युत्तर दिले आहे, सर्व द्विपक्षीय व्यापारी संबंध कमी केले आहेत, भारतीय विमानांसाठी हवाई हद्द बंद केली आहे आणि सिमला करार स्थगित करण्याची धमकी दिली आहे. त्याचबरोबर भारतावर सीमेपलीकडून दहशतवादी हल्ला झाल्याचा आरोपही पाकिस्तानने फेटाळून लावला आहे.

विमान प्रवास महागणार - पवार

पवार यांनी पाकिस्तानच्या हवाई हद्दीचे सामरिक महत्त्वही अधोरेखित केले. युरोपला जाणारी जवळपास सर्व विमाने पाकिस्तानातून उड्डाण करतात. हा मार्ग बंद झाल्यास विमान प्रवास महागात पडणार आहे.

तज्ज्ञांच्या मते, पाकिस्तानची हवाई हद्द बंद केल्याने मध्यपूर्व, कॉकस प्रदेश, युरोप, ब्रिटन आणि उत्तर अमेरिकेतील उड्डाणांवर परिणाम होईल. यामुळे उड्डाणाचा वेळ तर वाढेलच, शिवाय इंधनाचा वापरही वाढेल, ज्यामुळे तिकिटांच्या दरात वाढ होऊ शकते. २०१९ मध्ये पुलवामा हल्ल्यानंतर पाकिस्तानने चार महिन्यांसाठी हवाई हद्द बंद केली होती, तेव्हाच्या परिस्थितीची आठवणही पवार यांनी करून दिली. त्यावेळी भारतीय विमान कंपन्यांना सुमारे ७०० कोटी रुपयांचा तोटा सहन करावा लागला होता.

सुरक्षा व्यवस्थेत चूक- पवार

दहशतवादी हल्ल्याच्या पार्श्वभूमीवर पवार यांनी केंद्र सरकारच्या धोरणावर प्रश्नचिन्ह उपस्थित करत म्हटले की, काश्मीरमधील दहशतवाद संपला असे सरकार म्हणते. पण सुरक्षेत मोठी त्रुटी असल्याचे या घटनेवरून दिसून येते. हा हल्ला आणि त्यानंतर भारत-पाकिस्तान संबंधांमध्ये पुन्हा एकदा तणाव निर्माण झाला आहे. आता दोन्ही देश पुढे काय पावले उचलतात आणि राजनैतिक तोडगा निघू शकतो की नाही हे पाहावे लागेल.

सत्य काय आहे माहिती नाही - पवार

पहलगाममध्ये दहशतवाद्यांनी पर्यटकांची हत्या करण्यापूर्वी त्यांच्या धर्माविषयी विचारणा केल्याच्या वृत्ताची सत्यता मला माहित नाही, असे राष्ट्रवादी काँग्रेसचे अध्यक्ष शरद पवार यांनी शुक्रवारी स्पष्ट केले. दक्षिण काश्मीरमध्ये २२ एप्रिल रोजी झालेल्या दहशतवादी हल्ल्यात वाचलेल्या अनेकांनी दावा केला आहे की, दहशतवाद्यांनी हिंदूंना लक्ष्य केले. या वक्तव्यावर प्रतिक्रिया विचारली असता पवार म्हणाले की, सत्य काय आहे हे मला माहित नाही. महिलांना इजा झाली नाही, पण पुरुषांची हत्या करण्यात आली.

शरद पवारांच्या वक्तव्यावर प्रतिक्रिया देताना मुख्यमंत्री देवेंद्र फडणवीस म्हणाले की, पवार काय म्हणाले हे मला माहित नाही, पण मृतांचे कुटुंबीय आणि घटनास्थळी उपस्थित असलेले लोक काय म्हणाले ते मी ऐकले आहे. पवार यांनीही त्यांचे म्हणणे ऐकून घ्यावे. जम्मू-काश्मीरच्या पहलगाम जिल्ह्यात मंगळवारी दहशतवाद्यांनी केलेल्या गोळीबारात २६ जण ठार झाले. या हल्ल्यात अनेक जण जखमी झाले आहेत.