Satish Wagh Case : भाजप आमदाराचे मामा सतीश वाघ हत्या प्रकरणात खळबळजनक खुलासा, प्रेमप्रकरणातून पत्नीनेच दिली सुपारी

सतीश वाघ हत्येप्रकरणी त्यांच्याच पत्नीला अटक करण्यात आली आहे. शेजारी राहणाऱ्या व्यक्तीसोबत मोहिनी वाघ यांचे प्रेम प्रकरण होतं. यामध्ये सतीश वाघ अडथळा ठरत असल्याने मोहिनीने त्यांना संपवण्याचा निर्णय़ घेतला. याबाबतची कबुली मोहिनी वाघ यांनी पोलिसांकडे दिली आहे. 

सतीश वाघ हत्या प्रकरणात पोलिसांनी आत्तापर्यंत पाच जणांना अटक करण्य़ात आली आहे. मोहिनीने आपल्या पतीच्या हत्येची सुपारी अक्षय जवळकर याला दिली होती. पोलिसांनी या प्रकरणी पवनकुमार शर्मा, विकास शिंदे, अतिश जाधव आणि अक्षय जवळकर यांना याआधीच अटक केली आहे.

वाघ यांच्या हत्या प्रकरणात त्यांची पत्नीच मास्टरमाइंड निघाली आहे. पुणे पोलिसांच्या गुन्हे शाखेने या गुन्ह्याची उकल केली आहे. सतीश वाघ यांच्या हत्येचा मुख्य आरोपी त्यांची पत्नीच निघाल्याने एकच खळबळ उडाली आहे. 

९ डिसेंबर रोजी हत्या -

सतीश वाघ हे पुण्यातील प्रसिद्ध उद्योजक होते. ९ डिसेंबरला पहाटे मॉर्निंग वॉकसाठी घराबाहेर पडले असताना शेवरोले गाडीतून आलेल्या चार जणांनी त्यांचे अपहरण करून हत्या केली होती. ब्ल्यू बेरी हॉटेलच्या समोरून त्यांचे अपहरण केलं होतं. ही घटना सीसीटीव्हीत कैद झाली होती. या प्रकरणी हडपसर पोलीस ठाण्यात गुन्हा दाखल करण्यात आला होता. पोलिसांकडून त्यांचा शोध सुरु असतानाच त्याच दिवशी रात्री एका ठिकाणी घाटात सतीश वाघ यांचा मृतदेह सापडला होता. अपहरणानंतर त्याच गाडीत चाकूने भोसकून त्य़ांची हत्या केली होती, त्यांच्या शरीरावर ७२  वेळा वार केल्याचे समोर आले होते.