पावशेर दारू पिऊन कोणी धनजय मुंडेना अपमानित केलं तर...; गुणरत्न सदावर्तेंचा जरांगेंवर हल्लाबोल

गुणरत्न सदावर्ते यांनी नुकताच पत्रकारांशी संवाद साधला. त्यावेळी त्यांनी जरांगे पाटलांचा एकेरी उल्लेख केला. धनंजय मुंडे यांना रस्त्याने फिरू न देण्याचा इशारा देणाऱ्या जरांगे पटालांना सदावर्ते म्हणाले की, 'पावशेर दारू पिऊन कोणी धनजय मुंडेना अपमानित केले तर, त्याची गय केली जाणार नाही. तुमच्या बापाचे रस्ते आहेत का? शेतीला शेत असल्यास वाट द्यावी लागते. जरांगे तुझे काय शिक्षण आहे? जरांगे असो किंवा धस! मृतांच्या टाळूवरचे लोणी खात आहेत. एखाद्या मृत व्यक्तीच्या नावाखाली राजकारण करत आहेत. पंकजा मुंडे ताई आणि धनंजय मुंडे आज मंत्री आहेत, ही भारतरत्न डॉ. बाबासाहेब आंबेडकरांची देण आहे. जरांगे आणि धस सुपारीबाज आहेत. आम्ही धस आणि पावशेरचे चालू देणार नाही', असा इशारा त्यांनी दिला.

राज्यातील ग्रामपंचायतीत ९ जानेवारीला काम बंद आंदोलन

संतोष देशमुख यांच्या हत्येच्या निषेधार्थ आणि ग्रामपंचायत कर्मचाऱ्यांच्या सुरक्षेसाठी शासनाने ठोस कायदा करावा, या मागणीसाठी राज्यातील ग्रामपंचायतीत ९ जानेवारीला काम बंद आंदोलन करण्यात येणार आहे, अशीही माहिती सदावर्ते यांनी दिली.

जरांगे पाटील काय म्हणाले?

बीड येथील सर्वपक्षीय नेत्यांच्या मोर्चात जरांगे पाटील यांनी धनंजय मुंडे यांच्यावर सडकून टीका केली होती. ते म्हणाले होते की, 'संतोष देशमुख यांचे भाऊ धनंजय देशमुख न्यायासाठी लढत आहेत. वणवण फिरत आहेत. परंतु, धनंजय देशमुख यांना पोलीस ठाण्यात धमकविण्यात आले, अशी माहिती आम्हाला मिळाली. पण यापुढे संतोष देशमुख यांचे कुंटुब आणि त्यांचे भाऊ धनंजय देशमुख यांच्या केसाला धक्का लागला तरी धनंजय मुंडे यांना रस्त्यावर फिरू देणार नाही. आमचा भाऊ गेला, ते आम्ही सहन केले. पण यापुढे त्यांना डबल त्रास झाला तर, एकाला सुद्धा रस्त्याने फिरू देणार नाही,' असा इशारा जरांगे यांनी दिला.