हरिनामाच्या गजराने दुमदुमाला दिवे घाट; ज्ञानोबा माऊलींचा सोहळा सासवडला मुक्कामी

Sant Dnyaneshwar Maharaj Palkhi Sohala  हरिओम विठ्ठला, ज्ञानोबा-माऊली तुकाराम, पाऊले चालती पंढरीची वाट, माऊली, माऊली अशा अखंड नामघोषाने पायात संचारलेल्या बळाच्या जोरावर संत ज्ञानेश्वर महाराजांच्या पालखी सोहळ्याने नागमोडी वळणाचा चार किलोमीटरचा अवघड दिवे घाट लीलया पार केला. पुण्यातील गुरुवारचा मुक्काम आटोपल्यानंतरर ‘एवढा करा उपकार! देवा सांगा नमस्कार’ असे म्हणत शहरातील भक्तांनी पालखी सोहळ्याला साश्रू नयनांनी निरोप दिला. पालखी सोहळ्याने हरिनामाच्या गजरात हा घाट सायंकाळी ५ वाजता पार केला. रात्री ९ च्या सुमारास हा सोहळा सासवडला पोहचला. यावेळी सासवडकरांनी जल्लोषात या पालखी सोहळ्याचे स्वागत केले.

दिवे घाटातील हिरवाईन वारकऱ्यांना चालण्याची शक्ती मिळत होती. ही हिरवाई जणू काही पालखी सोहळ्यासाठी नटली होती, अशीच अनुभूती येत होती. अवघड असा दिवे घाट टाळ मृदुगांच्या गजरात भक्तिमय वातावरणात वारक-यांनी लिलया पार केला. शुक्रवारी पुण्यातील विश्रांतीनंतर शुक्रवारी मजल दरमजल करत हा सोहळा सोपानकाकांच्या सासवडनगरीच्या दर्शनाची ओढीने पुढे जात होता.

वडकी येथे पोहचल्यावर माऊलींना पंचपक्वान्नाचा नैवेद्य दाखविण्यात आला. हडपसर येथे विसावा घेतल्यानंतर दिवे घाटाची अवघड चढण सुरू झाली. लाखो वैष्णवजनांसह सायंकाळी पाच वाजण्याच्या सुमारास पालखी दिवे घाटात पोहोचली. हजारो भाविकांच्या उपस्थितीत ही चढण पार करून पालखीने पुरंदर तालुक्यात प्रवेश केला. घाटावर उपस्थित हजारो माऊली भक्तांनी हा नयनरम्य सोहळा याचि देही याचि डोळा अनुभवला. या वेळी घाटाच्या शेवटच्या टप्प्यात माऊलींच्या पालखीरथावर पुरंदरकरांच्या वतीने पुष्पवृष्टी आणि विठू नामाच्या गजरात माऊलींचे स्वागत करण्यात आले. पुण्यातील भक्तीसंगमानंतर संतश्रेष्ठ तुकोबाराय व ज्ञानोबा माऊलींची पालखी सोहळा सकाळी पुण्यनगरीतून पंढरपूरच्या दिशेने निघाला. ज्ञानोबा माऊलींची पालखी शुक्रवारी संत सोपानकाकांच्या नगरीत मुक्कामाला विसावली.