Ramdas Athawale: संविधानचा अवमान खपवून घेणार नाही; परभणी येथील घटनेवर रामदास आठवले यांची प्रतिक्रिया

परभणी शहरातील जिल्हाधिकारी कार्यालयासमोर महामार्गाजवळ डॉ. बाबासाहेब आंबेडकर यांचा पुतळा आहे. डॉ. बाबासाहेब आंबेडकर यांच्या पुतळ्यासमोर भारतीय संविधानाची प्रतिकृती ठेवण्यात आली. मंगळवारी संध्याकाळी साडेचार वाजताच्या सुमारास एका व्यक्तीने संविधानाची प्रत ठेवलेल्या काचा फोडल्याचा प्रकार घडला.

रामदास आठवले काय म्हणाले?

‘परभणीत मंगळवारी एका व्यक्तीने बाबासाहेबांच्या पुतळ्यासमोर संविधानाची प्रत ठेवलेल्या काचा फोडल्या, हा राज्यघटनेचा आणि बाबासाहेबांचा अपमान आहे. पोलिसांनी तात्काळ आरोपीला अटक केली. त्यांच्यावर कडक कारवाई करण्यात यावी, अशी आमची मागणी आहे. देवेंद्र फडणवीस सरकार सत्तेत आल्यानंतर कोणी वातावरण बिघडवण्याचा प्रयत्न करत आहे का? याची चौकशी व्हायला हवी, असे रामदास आठवले म्हणाले. ज्या आंबेडकरी बांधवांनी आंदोलन केले आहे, त्यांनी आंदोलन शांततेत ठेवावे’, असे रामदास आठवले यांनी अवाहन केले आहे.

परभणीतील घटना अत्यंत लाजिरवाणी- प्रियंका चतुर्वेदी

परभणीतील हिंसाचारावरून शिवसेना नेत्या प्रियांका चतुर्वेदी यांनी भाजप प्रणित महायुती सरकारवर निशाणा साधला असून सत्तेत राहणे हे सरकारचे प्राधान्य असल्याचे म्हटले आहे. कायदा व सुव्यवस्थेची जबाबदारी असलेला पूर्णवेळ गृहमंत्री राज्यात नाही, असे त्या म्हणाल्या. ही अत्यंत लाजिरवाणी घटना असून जो हिंसाचार होत आहे, तो दुर्दैवी आहे. हा हिंसाचार या सरकारच्या अपयशाचे द्योतक आहे. यावरून सरकारची प्राथमिकता दिसून येते, ती म्हणजे त्यांची सत्ता वाचवणे आणि राज्यातील जनतेसाठी काम करणे नाही, असे त्या म्हणाल्या.

जिल्हाधिकाऱ्यांचे नागरिकांना शांतता राखण्याचे आवाहन

परभणीचे जिल्हाधिकारी रघुनाथ खंडू गावडे यांनी नागरिकांना शांतता राखण्याचे आवाहन केले आहे. पोलिस प्रशासन रस्त्यावर उतरले आहे. आपल्याकडे परिस्थिती नियंत्रणात आहे; आम्ही अतिरिक्त पोलिसांना पाचारण केले आहे. त्यामुळे मी तुमच्या माध्यमातून सर्वांना शांतता राखण्याचे आवाहन करतो.

संजय राऊतांची महायुती सरकावर टीका

शिवसेना खासदार संजय राऊत यांनीही महायुती सरकारवर टीका केली आहे. महायुतीचे सरकार सत्तेवर आल्यापासून येथे अशा घटना सर्रास घडत आहेत. लोकांनी शांतता राखली पाहिजे. बाबासाहेब आणि त्यांच्या विचारांच्या पाठीशी आम्ही महाराष्ट्रातील जनता नेहमीच आहोत, हे सर्वांना ठाऊक आहे.

राज्याला हिंसेच्या गर्तेत ढकलण्याचे हे षडयंत्र- अतुल लोंढे

काँग्रेसचे मुख्य प्रवक्ते अतुल लोंढे पाटील यांनीही या घटनेवरून सरकारवर निशाणा साधला आहे. मरकटवाडी व इतर ठिकाणी ज्या प्रकारे हिंसाचार भडकवण्याचा प्रयत्न झाला आहे, त्यावरून राज्याला हिंसेच्या गर्तेत ढकलण्याचे हे षडयंत्र असू शकते, असे आम्हाला वाटते.