Rahul Gandhi : ‘सोमनाथ सूर्यवंशीची हत्या पोलिसांनीच केली अन् याला मुख्यमंत्री जबाबदार’, राहुल गांधींचा थेट आरोप

परभणी रेल्वे स्थानकाबाहेर असलेल्या संविधान प्रतिकृतीची १० डिसेंबर रोजी विटंबना झाल्याचा प्रकार घडला होता. त्यानंतर आंबेडकरी संघटनांनी पुकारलेल्या बंदला हिंसक वळण लागले होते. याप्रकरणी पोलिसांनी ५० जणांना अटक केली होती. त्यातील सोमनाथ सूर्यवंशी या तरुणाचा कोठडीतच मृत्यू झाला होता. ३५ वर्षीय सोमनाथ सूर्यवंशी या तरुणाचा परभणी जिल्हा कारागृहात न्यायालयीन कोठडीत मृत्यू झाला.आज सूर्यवंशी कुटुंबियांची भेट घेण्यासाठी खासदार राहुल गांधी हे परभणीत आले होते. निळा टी शर्ट परिधान करून राहुल गांधी यांनी सूर्यवंशी कुटुंबाची भेट घेतली. यावेळी त्यांच्यासमवेत महाराष्ट्र प्रभारी रमेश चेन्नीथल्ला, नाना पटोले, बाळासाहेब थोरात, आ. विजय वडेट्टीवार तसेच राज्यभरातील नेते उपस्थित होते. राहुल गांधी यांनी २० ते २५ मिनिटे सूर्यवंशी कुटुंबियांशी चर्चा केली.

महायुतीत तिढा कायम! खातेवाटपाचा वाद संपत नाही तोच ‘या’ मुद्यावरून सुरू झाले मतभेद!

काय म्हणाले राहुल गांधी -

सूर्यवंशी कुटूंबाची भेट घेतल्यानंतर प्रसारमाध्यमांशी बोलताना राहुल गांधी म्हणाले की, मी सूर्यवंशींच्या कुटुंबीयांना तसेच ज्या लोकांना पोलिसांकडून मारहाण झाली, त्यांनाही भेटलो. त्यांनी सोमनाथ सूर्यवंशी याचा पोस्टमॉर्टम रिपोर्ट, काही व्हिडिओ व फोटो दाखवले. पोस्टमार्टेम रिपोर्टमधून स्पष्ट झालंय की ही शंभर टक्के हत्या आहे. पोलिसांनीच न्यायालयीन कोठडीत असलेल्या सोमनाथची हत्या केली. सोमनाथ दलित असल्यानेच त्याची हत्या करण्यात आली. या प्रकरणात राजकारण न आणता तपास व्हावा.

पोलिसांना पाठिशी घालण्यासाठी मुख्यमंत्र्यांनी विधानसभेत खोटं निवेदन दिल्याचं राहुल गांधी म्हणाले.या तरुणाला यामुळे मारण्यात आलं, कारण तो दलित होताआणि तो संविधानाचे रक्षण करीत होता. आरएसएसची विचारधारा संविधान नष्ट करण्याची विचारधारा आहे. याची चौकशी करावी, यात संबंधितांना शिक्षा व्हावी, अशी आमची मागणी असल्याचे राहुल गांधी म्हणाले.