Viral News : पुणे-सोलापूर हायवेवर थरकाप उडवणारी घटना! जेवण दिलं नाही म्हणून हॉटेलमध्ये ट्रक घुसवला

इंदापूर तालुक्यातील हिंगणगाव इथं शुक्रवारी रात्री ही घटना घडली. त्याचा व्हिडिओ सध्या सोशल मीडियावर व्हायरल होत आहे. चालक भरधाव वेगानं ट्रकसह हॉटेलच्या गेटला वारंवार धडका देत असल्याचं त्यात दिसत आहे. त्याला थांबवण्यासाठी आजूबाजूचे लोक ट्रकच्या केबिनवर दगड मारतात. मात्र, ड्रायव्हरला काहीच फरक पडत नसल्याचंही दिसत आहे.

मिळालेल्या माहितीनुसार, ट्रकचालक सोलापूरहून पुण्याकडे जात होता. जेवणासाठी त्यानं पुणे-सोलापूर मार्गावरील हिंगणगावातील गोकुळ हॉटेलच्या बाहेर ट्रक थांबवला. ट्रक थांबवून तो हॉटेलच्या आत गेला आणि जेवण मागायला गेला. मात्र, किचन बंद झालं असल्यानं आता जेवण मिळणार नाही असं मालकानं त्याला सांगितलं. त्यामुळं त्याचा संताप अनावर झाला. 

हेही वाचा: रस्त्यावर बॅनर लावताना बीएमडब्लू कारनं दोन जणांना चिरडलं, मुंबईतील मुलुंड येथील घटना!

त्या रागातच तो परत आपल्या ट्रककडे गेला आणि ट्रक सुरू केला. सुरुवातीला हॉटेलच्या आवारातील दोन गाड्यांना त्यानं धडक दिली व नंतर ट्रक प्रवेशद्वारावर धडकवला. ट्रक मागे-पुढे घेऊन तो सतत गेटला धडका मारत होता. ट्रक चालकाला असं करताना पाहून आजूबाजूचे लोक त्याच्या दिशेनं धावले. बाहेरून आरडाओरडा करून लोक त्याला थांबवण्याचा प्रयत्न करत होते, पण तो थांबला नाही. ट्रकच्या धडकेत हॉटेलच्या गेटचा भागही तुटला.

ट्रकचालकाला रोखण्यासाठी शेवटी काही लोकांनी ट्रकवर दगडफेक केली. तरीही ट्रक ड्रायव्हर थांबत नव्हता. शेवटी काही वेळानंतर त्यानं ट्रक थांबवला. त्यानंतर तिथं जमलेल्या लोकांनी त्याला ताब्यात घेतलं. तोपर्यंत पोलीस घटनास्थळी पोहोचले होते. लोकांनी त्याला पोलिसांच्या हवाली केलं. सुदैवानं या सगळ्या प्रकारात कुणीही जखमी झालं नाही. या प्रकरणी पोलीस अधिक तपास करत आहेत.