पुणेकरांनो, गणेशोत्सव काळात उद्यापासून वाहतुकीमध्ये मोठा बदल! कोणते रस्ते बंद? पर्यायी मार्ग कोणते?
Pune ganeshotsav 2024 : गणेशोत्सवाच्या १० दिवसांमध्ये शहरातील एकूण १६ मध्यवर्ती रस्ते वाहतुकीसाठी बंद करण्यात येणार आहेत. त्याचबरोबर शहरातील १२ रस्त्यांवर जड वाहनांना गणेशोत्सवकाळात पूर्णपणे बंदी असणार आहे.
पुण्याच्या वैभवशाली गणेशोत्सवाला उद्यापासून (शनिवार) सुरुवात होत असून उद्या बाप्पाची प्राणप्रतिष्ठापना होणार आहे. गणेशोत्सव काळात शहरातील मध्यवर्ती भागातील वाहतुकीत काहीसा बदल करण्यात आला आहे. त्यामुळे वाहन चालकांनी पर्यायी मार्गाचा वापर करावा, असे आवाहन वाहतूक शाखेकडून करण्यात आले आहे.
गणेशोत्सवाच्या १० दिवसांमध्ये शहरातील एकूण १६ मध्यवर्ती रस्ते वाहतुकीसाठी बंद करण्यात येणार आहेत. त्याचबरोबर शहरातील १२ रस्त्यांवर जड वाहनांना गणेशोत्सवकाळात पूर्णपणे बंदी असणार आहे. शहरातील रस्ते संध्याकाळी पाचनंतर वाहतुकीसाठी पूर्णपणे बंद राहणार आहेत. तसेच पीएमपीच्या ६६ मार्गातही बदल करण्यात आले आहेत.
गणेशोत्सवाच्या दरम्यान रस्ते बंद असल्याने पुणे मेट्रोच्या वेळापत्रकात देखील बदल करण्यात आले असून प्रवाशांची गैरसोय टाळण्यासाठी गणेशोत्सवादरम्यान पुणे मेट्रोच्या जादा फेऱ्या करण्याचा निर्णय मेट्रोने घेतला आहे.
वाहतुकीत बदल असलेले रस्ते -
- शास्त्री रोड, टिळक रोड, कुमठेकर रोड, लक्ष्मी रोड, केळकर रोड, बाजीराव रोड, शिवजी रोड, कर्वे रोड, एफसी कॉलेज रोड, जंगली महाराज रोड, सिंहगड रोड, गणेश रोड येथे जड वाहनांना बंदी घालण्यात आली आहे. डेंगळे पूल ते शिवाजी पूल, श्रमिक भवनसमोर (अण्णा भाऊ साठे चौक) व कसबा पेठ पोलिस चौकी ते जिजामाता चौक येथे गणेशमूर्ती विक्रीचे स्टॉल मोठ्या संख्येने आहेत.
- तसेच मंडई आणि सावरकर पुतळा चौक ते समाधान भेळ सेंटर (सिंहगड रोड) या भागांत आहेत. त्यामुळे या भागांतील वाहतुकीत बदल करण्यात आला आहे. पाच ते सात सप्टेंबर दरम्यान सकाळी सहा ते रात्री १२ दरम्यान हा वाहतूक बदल असणार आहे.
- शिवाजी रोड-गाडगीळ पुतळा चौक ते गोटीराम भैय्या चौक (मंडई) परिसर वाहतुकीसाठी बंद असणार आहे. त्यामुळे वाहनचालकांनी पर्यायी मार्गाचा वापर करावा.
Lalbaugcha Raja First Look: ही शान कुणाची...! लालबागच्या राजाची पहिली झलक आली समोर, पाहा VIDEO
-पर्यायी मार्ग कोणते?
- प्रवाशांनी गाडगीळ पुतळा चौकातून डावीकडे वळून कुंभारवेस चौक,शाहीर अमर शेख चौकमार्गे इच्छितस्थळी जावे.
- शिवाजीनगर येथून शिवाजी रस्त्याने स्वारगेटकडे जाणाऱ्या वाहनचालकांनी स. गो. बर्वे चौकातून (मॉडर्न कॅफे चौक), जंगली महाराज रस्ता, खंडुजीबाबा चौक, टिळक रस्त्याने इच्छितस्थळी जावे.
- झाशी राणी चौक ते खुडे चौक, डेंगळे पूल मार्गे कुंभार वेशीकडे जाणाऱ्या वाहनचालकांनी खुडे चौकातून मनपा समोरून मंगला चित्रपट गल्लीतून कुंभार वेस किंवा प्रीमियर गॅरेज चौक शिवाजी पूल मार्गे, गाडगीळ पुतळा चौक, डावीकडे वळून कुंभार वेस चौक.
वाहतुकीसाठी खुले शहरातील रस्ते -
-फडके हौद चौक ते जिजामाता चौक ते फुटका बुरूज चौक
-अप्पा बळवंत चौक ते बुधवार चौक ते मोती चौक
-मंगला चित्रपटगृहसमोरील प्रीमिअर गॅरेज गल्ली ते कुंभार वेस
